دارالحکومت دہلی کے سنگھو بارڈر پر کسانوں نے مشکوک حرکت کرنے والے ایک نوجوان پکڑا ہے، اس نوجوان کو مشتعل کسانوں نے اس وقت پکڑا جب وہ پولیس اہلکار ہونے کا دعویٰ کرتے ہوئے کسانوں کے درمیان گھوم رہا تھا۔ شبہ ہوے پر کسانوں نے اس نوجوانوں سے پوچھ گچھ کی تب سارا معاملہ سامنے آیا۔
دیر رات کسانوں کی جانب سے مشتبہ نوجوانوں کے ساتھ ایک پریس کانفرنس کی گئی۔ کسانوں نے دعوی کیا کہ مشتبہ نوجوان کے ذریعہ 26 جنوری کو پریڈ کے دوران رکاوٹ پیدا کرنے کی بڑی سازش رچی گئی ہے۔
الزام یہ بھی ہے کہ اس نوجوان کے ساتھ اس کے کچھ ساتھی بھی ہیں اور ان کی ٹولی میں دو لڑکیاں بھی شامل ہیں۔ کسانوں نے الزام لگایا ہے کہ کچھ عناصر ان کی تحریک میں رکاوٹ ڈالنے اور اسے بدنام کرنے کی کوشش کر رہے ہیں، کسانوں نے مشتبہ نوجوان کو میڈیا کے سامنے پیش بھی کیا۔ مشتبہ نوجوان نے بتایا کہ اسے ہریانہ پولیس کے ایک ایس ایچ او نے یہاں بھیجا ہے۔
پکڑے گئے نوجوان نے بتایا کہ اسے 26 تاریخ کو ہونے والی کسان ٹریکٹر ریلی کے بیچ میں جانا تھا اور ابتدائی مرحلے میں ہوائی فائرنگ کرنا تھی، اس کے بعد جب ماحول مکمل طور پر خراب ہوتا تو کچھ منتخب کسان رہنماؤں کو وہ نشانہ بنانے والے تھے۔ اتنا ہی نہیں کسانوں کے مطابق مشتبہ نوجوان نے کرنال میں ایک ریلی میں پولیس اہلکار بن کر لاٹھی بھی چارج کیا تھا۔
اب اس پورے معاملے کی سچائی کیا ہے اس پر سے پردہ اٹھنا باقی ہے اور اس کے پیچھے کیا سازش تھی اور کس کے شہہ پر یہ نوجوان یہاں تک پہنچا تھا، پوری تفتیش کے بعد ہی معاملہ واضح ہوپائے گا۔
