ہریانہ کے ضلع نوح کے پونہانہ اسمبلی حلقے سے سوراج انڈیا کے امیدوار کے حق میں پارٹی کے سربراہ یوگیندر یادو نے تشہیر کی اور عوام کو خطاب کیا۔
اس موقعے پر یوگیندر یادو کہا کہ وہ متبادل سیاست کے علم بردار ہیں۔ وہ مسائل کو حل کرنے کی سیاست کرتے ہیں۔ وہ الیکشن سے پہلے بھی سیاست کرتے ہیں اور الیکشن کے بعد بھی۔
انہوں نے خطاب کرتے ہوئے کہا کہ جیسے کالج میں پڑھائی کرنے کے بعد امتحان دیا جاتا ہے ایسے ہی پانچ سال اقتدار میں رہنے کے بعد الیکشن آتا ہے اس وقت سیاسی رہنماؤں کا عوام کیلئے حساب دینا ہے اگر حساب ٹھیک ہو تو پانچ سال اور دیے جائیں ورنہ حکومت بدل دی جائے اور یہ وقت حکومت بدلنے کا ہے کیوں کہ بی جے پی حکومت ہر محاذ پر ناکام ہو گئی ہے۔
انہوں نے ہریانہ کے وزیراعلی منوہر لال کھٹر کو تنقید کا نشانہ بناتے ہوئے کہا کہ حکومت کی جانب سے وعدہ کے باوجود کسانوں کو سرسوں کا مکمل دام نہیں دیا گیا۔
سوراج انڈیا پارٹی کے سربراہ یوگیندر یادو نے مزید بتایا کہ انھوں نے 28 سیٹوں پر اپنے امیدوار اتارے ہیں اور تبدیلی ان کا مقصد ہے۔
گزشتہ روز سوراج انڈیا پارٹی کے سربراہ یوگیندر یادو نے میوات کے چار الگ الگ مقامات کا دورہ کیا اور عوام سے اپنے امیدواروں کے حق میں ووٹنگ کی اپیل کی۔
پونہانہ اسمبلی حلقے سے سوراج انڈیا پارٹی کی طرف سے تعلیم حسین ایڈوکیٹ امیدوار ہیں۔
دراصل ہریانہ میں اسمبلی انتخابات کے لیے رواں ماہ 21 اکتوبر کو ووٹنگ ہوگی، جبکہ 24 اکتوبر کو نتائج کا اعلان کیا جائے گا۔
