سپریم کورٹ نے بدھ کو مرکزی حکومت کو پرالی جلانے کے معاملہ پر ریاستی حکومتوں سے مشورہ کرکے تین ماہ میں ایک جامع منصوبہ لانے کا حکم دیا۔
جج ارون مشرا کی صدارت والی بنچ نے کہاکہ ریاستی حکومتوں کے مشورہ سے مرکز تین مہینہ کے اندر مستقبل کے لئے ایک جامع منصوبہ تیار کرے۔
عدالت نے ریاستی حکومتوں کو چھوٹے اور درمیانہ کسانوں کو پرالی کٹائی کے لئے کرایہ پر لی جانے والی مشینوں کا خرچ اور اس کام پر آنے والی لاگت مہیا کرانے کا حکم دیا۔
عدالت نے کہا کہ اس کے لئے پیسے فوری طورپر جاری کئے جانے چاہئیں۔ اس رقم کی ادائیگی مرکز کرے گا یا ریاستی حکومتیں کریں گی، اس معاملہ کو بعد میں دیکھ لیا جائے گا۔
عدالت عظمی میں آلودگی پر ہوئی سماعت کے دوران بدھ کو چار ریاستوں کے چیف سکریٹری موجود ہوئے۔ اس دوران عدالت نے پرالی جلانے کے معاملہ پر صحیح طریقہ سے اپنے فرائض کی ادئیگی نہیں کرنے پر سینئر حکام کی سرزنش کی۔
