بھارتی ریاست ہریانہ کے میوات میں پانی کا مسئلہ انتہائی سنگین ہوتا جا رہا ہے۔ مقامی لوگوں کا کہنا ہے کہ وہ ایک بڑی رقم دے کر ٹینکر کے ذریعہ پانی خریدنے پر مجبور ہیں۔
سنہ 2004 سے اب تک انیلو، کانگریس، بی جے پی اور اب جے جے پی کے ساتھ بی جے پی دوبارہ برسر اقتدار ہے، لیکن میوات کے حالات میں کسی بھی طرح کی تبدیلی نہیں آئی ہے۔ آج بھی میوات کے بیشتر گاؤں پانی کی ایک بوند کے لیے ترس رہے ہیں۔
انتظامیہ کو معاملے کا علم ہونے کے بعد رینیویل کے افسران نے صورتحال کو بہتر کرنے کی یقین دہانی کرائی ہے۔
وہیں پونہانہ سے رکن اسمبلی محمد الیاس کے صاحبزادے ایڈوکیٹ جاوید احمد نے انتظامیہ پر سنگین الزامات عائد کرتے ہوئے لاکھوں کی بدعنوانی کی بات کہی ہے۔
اب جبکہ انتظامیہ نے اس بات کی یقین دہانی کرائی ہے کہ جلد سے جلد مسئلے کا حل نکالا جائے گا اور پانی کی دستیابی کو یقینی بنایا جائےگا، تو دیکھنا یہ ہے کہ اس پریشانی سے عوام کو کب تک نجات ملتی ہے۔
