ایس ڈی پی آئی کا دہلی فسادات کی غیر جانبدارانہ عدالتی تحقیقات کا مطالبہ

سوشل ڈیموکریٹک پارٹی آف انڈیا نے آج ایک پریس کانفرنس منعقد کی اور دہلی فسادات اور این پی آر کے تعلق سے اپنی برہمی کا اظہار کیا۔

ایس ڈی پی آئی کے قومی جنرل سکریٹری عبدالمجید نے دہلی میں ہوئے تشدد اور فسادات کے دوران ہوئی اموات پر برہمی کا اظہار کرتے ہوئے بتایا کہ 'مختلف ویڈیوز میں پولیس کو فسادیوں کا ساتھ دیتے دیکھا گیا۔'

بی جے پی لیڈران نفرت انگیز بیانات اور تشدد بھڑکانے کے بعد بھی آزاد گھوم رہے ہیں۔ انہوں نے کہا کہ دہلی فسادات سے ایسا لگتا ہے کہ ملک کی جمہوریت کا گلا گھونٹا جارہا ہے۔

اس موقع پر ایس ڈی پی آئی کرناٹک کے ریاستی سکریٹری افسر کوڈلیپیٹ نے بی جے پی حکومت پر الزام لگایا کہ وہ حال ہی میں جاری کئے گئے ریاستی بجٹ 2020 میں اقلیتی طبقات کو نظر انداز کیا ہے۔