ریاست راجستھان میں سردی کا ستم مسلسل جاری ہے، لیکن یہاں پر سیاسی پارہ کافی زیادہ گرمایا ہوا ہے۔
اندازہ اسی بات سے لگایا جاسکتا ہے کہ راجستھان کے کوٹہ ضلع میں واقع جے کے لون ہسپتال میں 106 بچوں کی موت ہو جاتی ہے اور یہ پورا معاملہ سیاسی رنگ لینے لگتا ہے۔
اب بی جے پی کے ساتھ ساتھ دیگر سیاسی جماعتیں بھی کانگریس حکومت کے وزیروں کے استعفے کی مطالبات کرتی ہوئی نظر آرہی ہیں۔
جہاں ایک جانب بی جے پی کے ریاستی صدر ستیش پونیہ نے ٹویٹ کر وزیر اعلی گہلوت اور وزیر صحت رگھو شرما سے استعفیٰ کا مطالبہ کیا ہے۔
تو وہیں دوسری جانب راشٹریا لوک تانتریک جماعت کے سربراہ اور ناگور لوک سبھا نشست سے رکن پارلیمان ہنومان بینیوال نے وزیراعلیٰ اشوک گہلوت کو ٹویٹ کرکے کہا کہ جب یوپی کے گورکھپور میں بچوں کی موت ہوگئی تھی تو آپ نے وہاں کے وزیراعلی یوگی آدتیہ ناتھ کو بھی ٹویٹ کیا تھا اور کہا تھا کہ آپ کی ریاست میں اس طرح کا معاملہ سامنے آیا ہے تو آپ کو ذمہ داری پوری کرتے ہوئے استعفیٰ دے دینا چاہیے۔ اس ٹویٹ کو دوبارہ سے ہنومان بینیوال نے یہاں پر دکھایا اور وزیراعلی اشوک گہلوت کے استعفے کی مانگ کی۔
بہرحال کچھ بھی ہو جس طرح سے یہ پورا معاملہ سامنے آیا ہے اس کے بعد ذمہ داروں کی لاپروائی صاف طور پر ظاہر ہو رہی ہے اب کیا کچھ کاروائی ان پر کی جاتی ہے یا پھر وہ جانچ کے نام پر بچ جاتے ہیں یہ تو وقت ہی بتائے گا۔
حالانکہ اس پورے معاملے کے بعد 8 سے زیادہ ہسپتال کے کارکنان کو سسپنڈ بھی کر دیا گیا ہے ان پر جانچ چل رہی ہے۔
