علم ہر وقت اور ہر دوڑ کی ضرورت رہی ہے، تعلیم کے بغیر انسان ایسا ہی ہے جیسے وہ آنکھ رکھتے ہوئے بھی نابینا ہے۔ اس لیے حصول علم کے لیے منظم انداز میں کوشش کے ساتھ معیاری تعلیم کی طرف توجہ کی ضرورت ہے۔
آج کے مقابلہ جاتی دور میں ایسی تعلیم حاصل کی ضرورت ہے جو نہ صرف خود کے لیے بلکہ پورے معاشرے و ملک کے لیے مفید ہو۔
بہار میں رحمانی 30 اسی نہج پر گزشتہ کئی برسوں سے طلباء کے درمیان تعلیم کے لئے کوشاں ہے۔ جس کے اثرات ملک ہی نہیں بیرون ملک میں بھی دکھائی دے رہے ہیں۔
اسی ضمن میں ارریہ کے آزاد اکیڈمی ہائی اسکول میں رحمانی 30 میں داخلہ کے لیے مقابلہ جاتی امتحان منعقد ہوا۔
بہار کے کونے کونے سے طلبا و طالبات کی کثیر تعداد نے اس امتحان میں شرکت کی۔
مستقبل میں ملک کی قیادت سنبھالنے اور ترقی کی منزلیں طئے کرنے کے جذبے کے تحت ارریہ سے کل 186 طلبا و طالبات امتحان میں شریک ہوئیں جس میں 146 طلبا اور 40 طالبات شامل ہیں۔
مزید پڑھیں : مالیگاؤں سے رحمانی 30 امتحان میں 282 طلباء کی شرکت
امتحان اپنے وقت پر شروع ہوا اور دن کے تین بجے اختتام پذیر ہوا۔ امتحان میں شریک سبھی طلباء و طالبات پوری یکسوئی اور انہماک کے ساتھ آخری وقت تک سوالات حل کرتے ہوئے نظر آئے۔
آزاد اکیڈمی کے استاذ ماسٹر ارشد انور الف نے کہا کہ یہاں پرامن ماحول میں امتحان لیا گیا ہے، حالانکہ انہوں نے اس بات پر ضرور ناراضگی ظاہر کی کہ امتحان کے لیے چند گھنٹے قبل ہی دستخط رجسٹر بھیجی گئی۔ تاہم بدعنوانی سے پاک امتحان کا انعقاد کیا گیا۔
