گوئل نے جمعہ کے روز یہاں کوالٹی کونسل آف انڈیا کے کام کاج کا جائزہ لیتے ہوئے کہاکہ گڈز اینڈ سروسز کے معیار سے ملک کا مستقبل طے ہوگا۔
خود انحصار بھارت مہم میں ملک معیارسے بھرپور مصنوعات اور خدمات کے میدان میں آگے بڑھے گا۔
ویڈیو کانفرنسنگ کے ذریعہ کی جانے والی اس میٹنگ میں وزیر موصوف نے کہا کہ مصنوعات اورخدمات کے معیار کا تجزیہ اور سرٹیفیکیشن عقلی، شفاف، قابل اعتماد اور چھیڑ چھاڑ سے پاک ہونا چاہئے۔
انہوں نے کہا کہ معیاری مصنوعات اور خدمات سے نہ صرف گھریلو مارکیٹ میں پکڑ بنے گی بلکہ عالمی منڈی میں بھارتی مصنوعات مسابقت پذیر ہوجائیں گی۔
گوئل نے کوالٹی کونسل سے گورنمنٹ مارکیٹ پورٹل 'گورنمنٹ ای مارکیٹ پلیس' کے ساتھ تعاون کرنے کی اپیل کی اور کہا کہ اس سے پورٹل پر دستیاب مصنوعات کے معیار کو یقینی بنانے میں مدد ملے گی۔
کوالٹی کونسل کے کام کی ستائش کرتے ہوئے وزیر موصوف نے کہا کہ کورونا کی وبا کی وجہ سے لاک ڈاؤن کے دوران کونسل نے معیار کو برقرار رکھنے کے لئے قابل ذکر کام کیا ہے۔
انہوں نے کہا کہ اصل چیلنجز اور امکانات کورونا وائرس کی وبا کے خاتمے کے بعد آئیں گے۔
انہوں نے کہا کہ مستقبل میں جینے کا طریقہ مکمل طور پر بدلنے والا ہے، زندگی کی معاشرتی، خاندانی اورذاتی پہلو اس سے کسی طرح مستثنیٰ نہیں رہیں گے۔
نئے حالات معیار کے نئے اسٹینڈرڈز کی مانگ کریں گے۔ تعلیم ، صحت اور خدمات میں نئے معیارات طے کرنا ہوں گے۔
مرکزی وزیر نے کہا کہ کونسل کو نئے معیارات طے کرنے کے لئے بیرون ملک جاری نظام کا مطالعہ کرنا چاہئے۔ کونسل کو تعلیم، صحت، خدمات، ٹرانسپورٹ، پیکیجنگ، فوڈ پروسیسنگ اور چھوٹی صنعتوں کے شعبوں میں معیار پر توجہ دینی چاہئے۔
