مغربی بنگال کے دارالحکومت کولکاتا میں ہاتھرس کیس سے متعلق بایاں محاذ اور کانگریس نے احتجاجی ریلی نکال کر وزیر اعظم نریندر مودی اور اتر پردیش کے وزیر اعلی یوگی آدتیہ ناتھ کا پتلا نذر آتش کیا۔
وزیر اعلی ممتا بنرجی نے ایک طرف پیدل مارچ کیا تو وہیں بایاں محاذ اور کانگریس کی مختلف ذیلی تنظیموں نے احتجاجی ریلی نکالی۔
کانگریس اور بایاں محاذ نے بی جے پی کے خلاف جم کر نعرے بازی کی۔ اس کے ساتھ ہی انہوں نے وزیر اعلی ممتا بنرجی کو بھی تنقید کا نشانہ بنایا۔
ان کا کہنا تھا کہ وزیر اعلی ممتا بنرجی اپنی ریاست میں جنسی زیادتی کا شکار خواتین کو انصاف نہ دلاکر اتر پردیش کی متاثرہ کے لئے سڑکوں پر اتر رہی ہیں۔
بایاں محاذ اور کانگریس حامی یوپی بھون کے سامنے احتجاج کرنا چاہتے تھے، لیکن جب ریلی دھرمتلہ پہنچی تو پولس نے ان کا راستہ روک دیا، جس کے بعد پولس اور بایاں محاذ و کانگریس حامیوں کے درمیان جھڑپ بھی ہوئی۔
بایاں محاذ کی خاتون سمیتی نے پولس پر مار پیٹ کرنے الزام لگایا ہے۔ خاتون ریلی کی قیادت بایاں محاذ کی رہنما کنینیکا بوس کر رہی تھیں، جبکہ سابق مئیر کولکاتا کارپوریشن بکاش رنجن بھٹاچاریہ بھی ریلی میں شریک رہے۔
