کانپور کے شیلٹر ہوم میں دو لڑکیوں کے حاملہ پائے جانے پر کانگریس پارٹی کی جنرل سیکریٹری پرینکا گاندھی واڈرا نے اتر پر دیش حکومت پر شدید نکتہ چینی کرتے ہوئے کہا ہے کہ اس طرح کے واقعے کے انکشاف سے ظاہر ہوتا ہے کہ ایسے ادارے میں تحقیقات کے نام پر ہر چیز کو دبا دیا جاتا ہے۔
پرینکا گاندھی کی ایک فیس بک پوسٹ کے ذریعے ٹیگ کردہ میڈیا رپورٹ میں دعوی کیا گیا ہے کہ کانپور کے گورنمنٹ شیلٹر ہوم میں کورونا وائرس کی تحقیقات کے دوران پتہ چلا ہے کہ وہاں رہنے والی دو لڑکیاں حاملہ تھیں اور ان میں سے ایک ایچ آئی وی پازیٹو ہے۔
کانگریس کی جنرل سکریٹری پرینکا گاندھی نے فیس بک پر پوسٹ کیا کہ ایک حیران کن حقیقت سامنے آئی ہے کہ کانپور کے گورنمنٹ چائلڈ پروٹیکشن ہوم میں دو لڑکیاں حاملہ پائی گئی ہیں اور ایک ایچ آئی وی پازیٹیو ملی ہے۔
انہوں نے کہا 'مظفر پور (بہار) کے شیلٹر ہوم کی بچیوں کی پوری کہانی ملک کے سامنے ہے، ایسا معاملہ اترپردیش کے دیوریا سے بھی منظرعام پر آچکا ہے۔
کانگریس کی رہنما نے کہا کہ اس طرح کے واقعے سے ایک بار پھر ظاہر ہوتا ہے کہ تحقیقات کے نام پر ہر چیز کو دبا دیا جاتا ہے، لیکن سرکاری بچوں کے شیلٹر ہوم میں بہت ہی غیر انسانی واقعات پیش آرہے ہیں۔
آپ کو بتا دیں کہ کانپور شیلٹر ہوم میں کورونا ٹیسٹ کرنے کے دوران دولڑکیاں حاملہ اور ایک لڑکی ایچ آئی وی پازیٹیو پائی گئی ہیں، اس کے علاوہ یہاں 57 لڑکیوں میں کورونا کی تشخیص ہوئی ہے۔
