'بھارت اور پاکستان کے درمیان ثالثی منظور نہیں'

وزیراعظم نریندرمودی نے آج امریکی صدر ڈونلڈ ٹرمپ کی موجودگی میں دو ٹوک الفاظ میں کہا کہ بھارت اور پاکستان کے درمیان سبھی مسائل دوطرفہ ہیں ان میں کسی تیسرے فریق کا کوئی کردار قابل قبول نہیں ہے۔

وزیر اعظم نریندر مودی نے جی 7 ممالک کی چوٹی کانفرنس سے الگ ڈونلڈ ٹرمپ کے ساتھ مشترکہ پریس کانفرنس میں کہا کہ بھارت اور پاکستان کے درمیان سبھی مسائل دوطرفہ ہیں اور ہم دنیا کے کسی بھی ملک کو زحمت نہیں دینا چاہتے۔

انہوں نے کہا کہ مجھے یقین ہے کہ بھارت اور پاکستان سنہ 1947 سے پہلے ایک ہی تھے اور مل کر سبھی مسائل پر بات چیت بھی کرسکتے ہیں نیز ان کا حل بھی نکال سکتے ہیں۔

کشمیر مسئلے پر ثالثی کی پیش کش کر چکے ٹرمپ نے مودی کی بات سے اتفاق ظاہر کرتے ہوئے کہا کہ بھارت اور پاکستان اپنے مسئلے خود سلجھالیں گے۔

نریندر مودی نے کہا کہ پاکستانی وزیراعظم عمران خان کے انتخابات جیتنے کے وقت انہوں نے ٹیلی فون پر ان سے کہا تھا کہ پاکستان اور بھارت دونوں کو غریبی ،ناخواندگی اور بیماریوں سے لڑنا ہے، دونوں ممالک مل کر ان تمام مسائل کو حل کر سکتے ہیں۔