گجرات کے احمدآباد میں ہسپتال میں آتشزدگی سے ہلاک مریضوں کو لیکر وزیر اعظم نریندر مودی نے غم کا اظہار کیا ہے اور ہلاک مریضوں کے اہل خانہ کے تئیں تعزیت کا اظہار کیا ہے۔
وزیر اعظم نے بتایا کہ انہوں نے معاملے کے متعلق گجرات کے وزیر اعلیٰ وجے روپانی اور احمدآباد کی میئر بیجاج پٹیل سے بات کی ہے۔ انہوں نے کہا کہ انتظامیہ متاثرہ افراد کو ہر ممکن امداد فراہم کر رہا ہے۔
وزیر اعظم نے اپنے ٹویٹ میں لکھا ہے کہ ''احمد آباد میں ہسپتال میں المناک آتشزدگی سے غمزدہ ہوں اور سوگوار خاندانوں سے تعزیت کا اظہار کرتا ہوں۔ زخمیوں کی جلد صحت یابی کی دعا کرتا ہوں۔ میں نے وزیراعلیٰ وجے روپانی اور میئر بیجاج پٹیل سے بات کی ہے۔ انتظامیہ متاثرہ افراد کو ہر ممکن مدد فراہم کررہا ہے۔''
اس کے علاوہ وزیر داخلہ امیت شاہ نے بھی ٹویٹ کر غم کا اظہار کیا ہے۔ امیت شاہ نے لکھا کہ ''احمد آباد کے ایک اسپتال میں آتشزدگی کے المناک حادثے کے نتیجے میں جانوں کے نقصان سے رنجیدہ ہوں۔ غم کی اس گھڑی میں متاثرہ کنبے کے ساتھ میں تعزیت کا اظہار کرتا ہوں۔ زخمیوں کی جلد صحتیابی کے لئے دعا کرتا ہوں۔''
واضح ہو کہ احمدآباد کے نورنگپورا میں واقع کووڈ شرے ہسپتال میں اچانک ہوئی آتشزدگی میں 8 مریض ہلاک ہو گئے ہیں۔
