اقوام متحدہ کی جنرل اسمبلی کے اجلاس میں حصہ لینے کے بعد امریکہ شہر نیویارک سے وطن واپس ہورہے پاکستان کے وزیراعظم عمران خان کے طیارے میں تکنیکی خرابی آنے کی وجہ سے واپس ہنگامی لینڈنگ کرانی پڑی۔
وزیراعظم عمران خان کے طیارہ کو تکنیکی خرابی کے باعث نیویارک کے جان ایف کینیڈی ایئرپورٹ پر واپس اتارا گیا۔
اطلاع کے مطابق پاکستان کے وزیراعظم عمران خان تقریباً چھ گھنٹے پہلے نیویارک سے پاکستان کے لیے روانہ ہوئے تھے، اسی دوران ٹورنٹو کے قریب طیارہ کو معمولی نوعیت کی تکنیکی خرابی پیش آئی جس کی وجہ سے طیارے واپس نیو یارک بھیجا گیا۔
اطلاع کے مطابق طیارہ کی تکنیکی خرابی ابھی تک ٹھیک نہ کی جاسکی جس کے باعث پاکستانی وزیراعظم رات نیویارک میں ہی گزاریں گے۔
واضح رہے کہ گزشتہ روز اقوام متحدہ کی جنرل اسمبلی کے 74 ویں اجلاس سے خطاب میں پاکستان کے وزیراعظم عمران خان نے نے ایک مرتبہ پھر خطاب کرتے ہوئے کشمیر کا راگ الاپا۔ اور کشمیر کے تعلق سے بھارتی حکومت کے حالیہ فیصلے پر سخت نکتہ چینی کی۔
عمران خان کی اقوام متحدہ کی جنرل اسمبلی میں کی گئی تقریر کو چار حصوں میں منقسم کیا جاسکتا ہے، انہوں نے موسمیاتی تبدیلی، منی لانڈرنگ، اسلاموفوبیا اور مسئلہ کشمیر پر واضح طور پر اپنا موقف رکھا۔
اپنی تقریر کے دوران انہوں نے اس بات پر زور دیا کہ وہ صرف مسئلہ کشمیر کو عالمی فورم پر رکھنے کے مقصد سے اقوام متحدہ کی جنرل اسمبلی سے خطاب کر رہے ہیں۔
ان کا کہنا تھا کہ کشمیر میں سینکڑوں سیاسی رہنماؤں اور نوجوانوں کو حراست میں رکھا گیا ہے۔
وزیراعظم عمران خان نے عالمی برادری کو مخاطب کرتے ہوئے کشمیر میں گزشتہ 56 روز سے نافذ کرفیو ختم کرنے اور 13 ہزار کشمیریوں کو رہا کرانے کے لیے بھارت پر زور ڈالنے کا مطالبہ کیا۔
