گارجینس کے ایک گروپ نے سپریم کورٹ کا رخ کرتے ہوئے ایک جولائی سے 15 جولائی تک 10ویں اور 12 ویں کے امتحان کے انعقاد پر روک لگانے کی اپیل کی ہے۔
وکیل ریشی ملہوترا کے ذریعہ دائر عرضی میں کوویڈ 19 کی وبا کی بھیانک ہوتی صورت حال کو بنیاد بنا کر طلبہ کو انٹرنل اسسمنٹ کی بنیادپر نمبر دئے جانے اور اس کے بعد ریزلٹ جاری کرنے کی اپیل کی گئی ہے۔
عرضی میں کہاگیا ہے کہ دہلی یونیورسٹی اور انڈین انسٹی ٹیوٹ آف ٹیکنولوجی(آئی آئی ٹی)سمیت کئی بڑے تعلیمی اداروں اور یونیورسٹی نے کسی بھی امتحان کا انعقاد نہ کرنے کا فیصلہ کیا ہے اور سی بی ایس ای کو بھی ہدایت دی گئی ہے کہ وہ باقی مضامین کےلئے امتحان کا انعقاد نہ کرے۔
انہوں نے کہا کہ چھتیس گڑھ سمیت کچھ ریاستوں میں بورڈوں نے طلبہ کو خطرناک وائرس کے رابطے میں آنے سے بچانے کےلئے کوئی بھی امتحان منعقد نہ کرنے کا فیصلہ کیاہے۔
واضح رہے کہ شمال مشرقی دہلی میں تشدد کی وجہ سے دسویں کے کچھ امتحانات ملتوی کردئے گئے تھے اور کورونا کی وبا کی وجہ سے بارہویں کے کچھ مضامین کے امتحان ٹال دئے گئے تھے۔سی بی ایس ای نے انہیں جولائی کے پہلے 15 دن میں کرانے کا فیصلہ کیا ہے۔
