بیجےپی کے صدر امت شاہ نے اشارہ کیا کہ پارلیمنٹ کا موجودہ اجلاس دس دن کے لیے بڑھایا جاسکتا ہے، تاکہ 25 سے زائد زیر التوا بل پاس کرائے جاسکیں۔
میٹنگ میں وزیراعظم نریندرمودی، وزیر دفاع راجناتھ سنگھ، بی جے پی کے کارگزار صدر جگت پرکاش نڈا، راجیہ سبھا میں بی جے پی کے رہنما تھاور چندگہلوت، پارلیمانی امور کے وزیر پرہلاد جوشی وغیرہ بھی موجود تھے۔
میٹنگ میں مرکزی جل شکتی کے وزیر گجیندر سنگھ شیکھاوت نے ہر کھیت اور ہر گھر میں جل پہنچانے کے حکومت کے عہد اور اس پر عمل درآمد ہونے کے روڈمیپ کے سلسلے میں ایک پیش کش کی۔
اس پیش کش میں ملک کے مختلف حصوں میں پانی کی فراہمی کی صورت حال کی تفصیلات دی گئی ہیں۔
اس کے علاوہ جن ممالک میں پانی مکمل طور پر ختم ہو گیا تھا ان میں دوبارہ پانی کیسے لایا گیا ان کے تجربوں کی معلومات دی گئی۔
ذرائع کے مطابق شیکھاوت نے اراکین پارلیمنٹ سے اپنے اپنے علاقوں میں آبی بحران کے مسائل کو نوٹ کرنے اور ان سے نمٹنے کے طریقوں کے بارے میں مشورے دینے کی اپیل کی ہے۔
