پارلیمنٹ کے بجٹ سیشن کا آغاز آج

ایوان زیریں اور ایوان بالا کے مشترکہ اجلاس کا آج انعقاد ہوگا، جس سے صدر رام ناتھ کووند خطاب کریں گے۔ وہ پارلیمان کے سینٹرل ہال میں گیارہ بجے خطاب کریں گے۔

اس کے علاوہ نائب صدر وینکیا نائیڈو آج اپنی رہائش گاہ پر راجیہ سبھا کے فلور لیڈرز کے ساتھ میٹنگ کریں گے۔
مرکزی بجٹ سنیچر کو پیش کیا جائے گا۔ بجٹ سیشن کا پہلا مرحلہ 11 فروری کو ختم ہوگا جبکہ دوسرا مرحلہ دو مارچ کو شروع ہوگا اور تین اپریل کو ختم ہوگا۔
بی جے پی کی ایگزیکیٹیو کمیٹی کی دوپہر دو بجے پارلیمان لائبریری میں میٹنگ ہوگی جبکہ این ڈی اے کی دوپہر 3:30 بجے میٹنگ ہونے کی توقع ہے۔
جمعرات کے روز کل جماعتی اجلاس کا انعقاد عمل میں آیا، جس میں وزیر اعظم نریندر مودی، پارلیمانی امور کے وزیر پرلہاد جوشی دیگر کابینی وزرا اور حزب مخالف کے رہنما بھی موجود تھے۔
اس موقع پر وزیر اعظم نے کہا کہ حکومت بجٹ سیشن کے دوران تمام امور بشمول معاشی موقف پر بحث کے لیے تیار ہے۔
مرکزی وزیرخزانہ نرملا سیتارمن ایک ایسے وقت مرکزی بجٹ 2020ء پیش کرنے والی ہیں جبکہ سارے ملک میں این آر سی، این پی آر اور شہریت ترمیمی قانون کے خلاف بڑے پیمانے پر احتجاجی مظاہرے جاری ہیں۔ جبکہ ملک کی معیشت کے کمزور ہونے اور جی ڈی پی کی شرح گھٹنے کی بھی رپورٹز ہیں۔