دلی میں کانگریس پارٹی کے دفتر سے منسوب ایک بیان میں کہا گیا ہے کہ منموہن سنگھ کرتار پور راہداری کی افتتاحی تقریب میں شرکت سے متعلق فیصلہ اس وقت کریں گے جب پاکستان کی جانب سے انھیں باقاعدہ دعوت نامہ موصول ہوگا۔
پاکستان نے کرتارپور راہداری کی افتتاحی تقریب میں بھارت کے سابق وزیراعظم منوموہن سگھ کو مدوع کرنے کا فیصلہ کیا ہے۔
اب سوال یہ ہے کہ کیا منموہن سنگھ اس میں شرکت کریں گے، عام طور پر اس طرح کے امور پر فیصلہ وزارت خارجہ کے صلاح و مشورے کی بنیاد پر کیا جاتا ہے جس سے واضح ہے کہ وہ اس میں مشکل سے ہی شرکت کر پائیں گے۔
گرچہ منموہن سنگھ کے دفتر سے اس بارے میں کوئی حتمی وضاحت نہیں کی گئی ہے تاہم ذرائع ابلاغ میں یہ بات ابھی سے گردش کرنے لگی ہے کہ خارجی امور میں حکومت کے ساتھ کھڑے ہونے کے لیے منموہن سنگھ یہ دعوت نامہ ٹھکرا دیں گے۔
اس سے قبل پاکستان کے وزیر خارجہ محمود قریشی نے اپنے ایک ٹیویٹ پیغام کہا تھا کہ کرتارپور راہداری کی افتتاحی تقریب میں بھارت کے سابق وزیراعظم ڈاکٹر منموہن سنگھ مہمان خصوصی ہوں گے۔
انہوں نے لکھا تھا کہ کرتار پور راہداری ایک اہم منصوبہ ہے اور پاکستانی وزیراعظم عمران خان کی اس میں ذاتی دلچسپی ہے اس لیے مشاورت کے بعد یہ فیصلہ کیا گيا ہے۔
انہوں نے کہا کہ ہم کرتارپور راہداری کی افتتاحی تقریب میں بھارت کے سابق وزیراعظم ڈاکٹر منموہن سنگھ کو مدعو کررہے ہیں۔
وزیرخارجہ کا کہنا ہے کہ منموہن سنگھ کا مذہب بھی ہے اور وہ سکھ طبقے کی نمائندگی بھی کرتے ہیں۔
انہوں نے لکھا: 'میں پاکستان کے وزیرخارجہ کے طور پر ڈاکٹر منموہن سنگھ کو دعوت دیتا ہوں کہ وہ اس افتتاحی تقریب میں تشریف لائیں۔'
واضح رہے کہ منموہن سنگھ کو یہ دعوت نامہ تحریری طور پر جلد ہی ارسال کیا جائےگا۔
شاہ محمود قریشی نے سکھ برادری کو بھی اس تقریب میں شرکت کی دعوت دی ہے تاکہ وہ گرو ناننک کے 550 ویں سالگرہ کی خوشیوں میں شامل ہوسکیں۔
خیال رہے کہ پاکستان گرونانک کے 550 ویں یوم پیدائش کے موقع پر نومبر میں کرتارپور راہداری کھولنے کے لیے پرعزم ہے۔
کرتارپور گوردوارہ ضلع نارووال کی تحصیل شکر گڑھ میں واقع ہے جو بھارتی سرحد سے کچھ ہی فاصلے پر واقع ہے۔ گردوارہ دربار صاحب سنہ 1539 میں قائم کیا گیا تھا۔ گرونانک نے وفات سے قبل 18 برس تک اسی مقام پر قیام کیا تھا اور پھر اسی مقام پر ان کا انتقال بھی ہوا تھا۔
لاہور سے تقریباً 120 کلومیٹر کے فاصلے پر ضلع نارووال میں دریائے راوی کے کنارے آباد ایک بستی کو کرتارپور کہا جاتا ہے۔ یہ بستی بھارت سے تقریبا تین کلومیٹر کے فاصلے پر واقع ہے۔
