یوپی کے ہاتھرس میں دلت لڑکی کے ساتھ جنسی زیادتی اور قتل کے معاملے میں احتجاج کا سلسلہ تھمنے کا نام نہیں لے رہا ہے۔
بریلی میں شہر کے تمام صفائی کارکنان نے ایک دن کے لئے کام بند کر ضلع کے سیٹھ دامودر پارک میں دھرنا دیا اور دلت سماج میں اتحاد پیدا کرنے کی اپیل کی۔
احتجاج کرنے والوں نے گورنر کے نام ضلع انتظامیہ کو ایک میمورنڈم بھی پیش کیا، جس میں دلت خاندان کو انصاف اور ضلع انتظامیہ کے خلاف کارروائی کا مطالبہ کیا گیا ہے۔
غورطلب ہے کہ تمام صفائی اہلکار شہر اور دیہی علاقوں میں سرکاری ملازم ہیں۔ ان لوگوں نے ایک دن پورے ضلع میں صفائی کا کوئی کام نہ کر کے احتجاج میں شرکت کرنے کا فیصلہ کیا۔
لوگوں کا کہنا ہے کہ ہاتھرس میں پیش آنے والا واقعہ انسانیت کے چہرے پر ایک بدنما داغ ہے۔ اس غیر انسانی واقعے میں سب سے بڑی شرمندگی کی بات یہ ہے کہ ظلم کے بعد دلت خاندان پر مزید ظلم کیا جا رہا ہے۔
احتجاج میں موجود دلت رہنماؤں کا کہنا ہے کہ اہل خانہ کے ساتھ یکے بعد دیگرے مظالم ہوتے رہے ہیں۔ ہاتھرس کے اعلیٰ افسران نے بھی ریاستی حکومت کو غلط فیڈبیک دے کر معاملہ کو سُلجھانے کے بجائے اُلجھانے کا کام کیا ہے۔
