جے ای ای اور نیٹ امتحانات کے انعقاد کے لیے ملک گیر سطح پر احتجاج ہو رہا ہے اور اس ملتوی کرنے کا مطالبہ کیا جا رہا ہے لیکن مرکزی حکومت اسے ملتوی کرنے کے موڈ میں نظر نہیں آرہی ہے۔
ایسے میں ریاست تلنگانہ کی ایس آئی او نے اپنی ریاست حکومت سے اپیل کی ہے کہ وہ نیٹ اور جے ای ای امتحانات کی تاریخوں پر نظر ثانی کے لیے سپریم کورٹ میں عرضی داخل کرے۔
ایس آئی او کا کہنا ہے کہ مسابقتی امتحانات میں کامیابی حاصل کرنے کے لیے سخت جدوجہد کرنے والے طلباء کے لیے کریئر اور زندگی کو خطرے میں ڈالنے کے درمیان انتخاب کرنا ایک سخت کام ہے اور پچھلے کچھ دنوں سے کورونا معاملات کی تعداد میں اضافہ سے طلباء اور والدین میں خوف و ہراس اور پریشانی کاسبب بنا ہوا ہے۔
اس سلسلہ میں وزیر تعلیم رمیش پوکھریال کے بیانات کافی غیر ذمہ دار ہیں۔ امتحانات اور کریئر کی اہمیت اپنی جگہ صحیح ہے لیکن طلباء کی صحت اور ان کی حفاظت بھی افضل ہے۔ کورونا کے ساتھ رہنا سیکھنا ضروری ہے، تاہم اس کا بوجھ صرف شہریوں، خاص طور پر طلباء پر ہی نہیں ہونا چاہئے۔
ایس آئی او (تلنگانہ) کے ریاستی صدر ڈاکٹر طلحہ فیاض الدین نے کہا کہ 'ایسے حالات میں سہولیات فراہم کرنا حکومت کی یکساں ذمہ داری ہے۔ حکومت ان طلباء کے لیے مناسب سہولیات کی فراہمی کو یقینی بنائے جو نیٹ جے ای ای میں شرکت کررہے ہیں اور ان کو ہجوم اور مراکز کے لیے سفر کرنے کے خطرناک حالات میں نہ ڈالا جائے۔
انہوں نے کہا کہ 'اس سلسلہ امتحانات ملتوی کرنے کی ضرورت ہے۔ ان سہولیات میں ایس او پیز کے ساتھ مراکز کی تعداد میں بہت زیادہ اضافہ اور مراکز کے شہروں میں اضافہ شامل ہونا چاہیے تاکہ ہجوم اور سفر کو کم سے کم کیا جاسکے۔
ڈاکٹر طلحہ نے ریاست تلنگانہ کی حکومت سے مزید 6 ریاستوں کی طرح امتحان کی تواریخ کو عارضی طور پر ملتوی کرنے کی سپریم کورٹ میں نظرثانی کی عرضی داخل کرنے پر زور دیا۔
