بھیونڈی میں بہیمانہ قتل کی واردات

مہاراشٹر کے دارالحکومت ممبئی سے متصل بھیونڈی ویر ہاوس علاقے کالہیر میں ایک شخص کے بہیمانہ قتل کے سبب علاقے میں خوف کا ماحول ہے۔

پیر کے روز کالہیر کے دیپ لکشمی کمپلکس کے پہلی منزل پر ایک بند گالے سے بدبو آنے کی شکایت کے بعد نارپولی پولیس بندگالے کا تالا توڑ کر اندر داخل ہوئی تب وہاں ایک شخص کی نعش برآمد ہوئی جس کا گلا اور ہاتھ کٹا ہوا تھا۔

پولیس تحقیقات میں پتہ چلا کہ قتل کی یہ واردات دو دن قبل ہوئی تھی۔نامعلوم قاتلوں نے قتل کے بعد لاش کو موقع واردات پر چھوڑ کر وہاں تالا لگا کر فرار ہوگئے۔ مقتول کی شناخت سدانند راگھو بھوئر نامی شخص کے طور پر ہوئی،جس کا آبائی وطن مُرباڑ ہے۔اس سلسلہ میں نارپولی پولیس نے قتل کا مقدمہ درج کیا اورقاتلوں کا پتہ لگانے کے لیے تفتیش شروع کردی۔