کانگریس کے اقلیتی مورچہ کے رہنماؤں نے کہا کہ مخلوط حکومت میں مسائل پیدا ہونے کی وجہ سینئر رہنماؤں میں آپسی اختلاف اور عہدہ کی چاہت ہے۔
ان رہنماؤں کا کہنا ہے کہ جو رہنما آج استعفیٰ دے رہے ہیں انہوں نے پارٹی کے احسانات کو فراموش کردیا ہے۔ یہ اراکین اسمبلی برسوں تک مختلف وزارتوں پر فائز رہے لیکن مخلوط حکومت کی مجبوریوں اور وقت کے تقاضوں کو قبول کرنے میں ناکام رہے
ان رہنماؤں نے اپنی خود غرضی کو پارٹی پر فوقیت دی اور استعفیٰ دیا۔ شہر میں کانگریس اقلیتی محکمہ کا اجلاس منعقد کیا گیا جس میں کانگریس اقلیتی محکمہ کے قومی صدر ندیم جاوید نے مہمان خصوصی کے طور پر شرکت کی اور اپنا کلیدی خطبہ پیش کیا۔
انہوں نے کہا کہ پچھلے پارلیمانی انتخابات میں کانگریس پارٹی کی ہار کے بعد پارٹی کے کارکنان میں مایوسی سی چھائی ہوئی ہے. اس میں کوئی شک نہیں کہ اس کی کئی وجوہات ہیں لیکن ہمیں بلکل بھی ہمت نہیں ہارنی ہے بلکہ کمربستہ ہوکر اگلے انتخابات کی تیاری میں لگنا ہے۔
ندیم کہتے ہیں کہ بی جے پی نے کانگریس کے رہنماؤں پر لوٹس آپریشن چلایا ہے ، جب کہ مستعفی ایم ایل ایز کا کہنا ہے کہ ہم پر کوئی آپریشن لوٹس نہیں ہوا ہے ہم نہایت ہی سینئر رہنما ہیں اور ہمیں ایسے آپریشن کا نشانہ نہیں بنایا جاسکتا۔ مستعفی ایم ایل ایز مزید کہا کہ ہم نے استعفے حکومت کے بدنامی اور بد دیانتی کی وجہ سے دیے ہیں۔
