کورونا وائرس سے بچنے کے لیے دعا اور دوا کی ضرورت

موجودہ وقت میں عالمی سطح پر کورونا وائرس نے قہر برپا رکھا ہے، اس کی شروعات چین سے ہوئی تھی لیکن اب یہ مختلف ممالک تک پہنچ چکا ہے جس کے اثرات اب بھارت میں بھی دیکھنے کو مل رہے ہیں۔

اترپردیش کے دارالحکومت لکھنؤ میں بھی چھ لوگ اس وائرس کی زد میں آگئے ہیں۔ شہر کے کنگ جارج میڈیکل یونیورسٹی میں ان متاثرین کی جانچ کی گئی لیکن کوئی غلطی نہ ہو اس کے لیے پونے کی لیب میں ان کے سیمپل بھیجے گئے ہیں۔

لکھنو شہر کے قاضی مولانا خالد رشید فرنگی نے ایک بیان جاری کرتے ہوئے کہا کہ آج جمعہ مبارک کا دن ہے لہذا ہماری سبھی مساجد کے ائمہ سے گزارش ہے کہ وہ اپنی اپنی مساجد میں بعد نماز جمعہ کورونا وائرس میں مبتلا لوگوں کے حق میں دعا کریں۔

انہوں نے کہا کہ کورونا وائرس سے عوام کو گھبرانے کی ضرورت نہیں ہے بلکہ ڈاکٹروں سے رابطہ کریں اور جو بھی ضروری احتیاط ہو اسے ضرور کریں۔ انہوں نے مزید کہا کہ اس کے لیے دعا اور دوا دونوں کی ضرورت ہے۔

قابل ذکر ہے کہ اب تک اترپردیش میں 105 افراد لوگ اس وائرس کی چپیٹ میں آئے ہیں وہیں دارالحکومت لکھنؤ میں بھی پانچ افراد اس مرض میں مبتلا ہیں۔

اُترپردیش میں اب وائرس متاثرہ 12 ممالک کے تقریباً 2303 لوگ آئے ہیں اور یو پی کے ایئرپورٹ پر کل 7684 لوگوں کی جانچ کی گئی ہے۔