اترپردیش مدرسہ تعلیمی بورڈ کی جانب سے مدارس عربیہ میں تعلیمی سیشن شروع کرنے کے لئے احکامات جاری کر دیے گئے ہیں۔ کووڈ 19 کے سلسلے میں طے شدہ گائڈ لائن کے عین مطابق مدارس کے منتظمین کو درس و تدریس کا عمل شروع کرنا ہے۔
رجسٹرار اترپردیش مدرسہ تعلیمی بورڈ کی جانب سے کہا گیا ہے کہ مدارس کو چاہیے کہ وہ ایس او پیز پر سختی سے عمل کرنے کو یقینی بنائیں۔ حکم نامے کے مطابق سیکنڈری، سینئر سیکنڈری، کامل اور فاضل کے درجات شروع کرنے کی اجازت دی گئی ہے۔
اس ضمن میں سوشل ڈسٹنسنگ کا خاص خیال رکھنے کی بھی ہدایت دی گئی ہے۔ ضلع مئو میں بھی مدارس کے ذمہ دار تعلیمی سرگرمیاں شروع کرنے کی تیاری کر رہے ہیں، لیکن بنیادی دقت یہ ہے کہ ابھی تک مدارس میں طلبا کی حاضری نفی کے برابر ہے۔ اس کی وجہ یہ ہے کہ مدارس کے زیادہ تر طلبا دور دراز علاقوں سے آ کر یہاں مدرسہ کے ہاسٹل میں رہائش اختیار کرتے ہیں۔
فی الحال ہاسٹل خالی ہیں اور مدارس کے ذمہ داروں کو طلبا کا انتظار ہے۔ مدارس کی جانب سے طلبا کو اطلاعات دی گئی ہیں۔ امید ہے کہ جلد ہی مدارس عربیہ میں تعلیم و تدریس کا عمل شروع ہو جائے گا۔
