مرکزی حکومت نے کورونا وبا سے نمٹنے کے لیے لاک ڈاؤن کو ایک مناسب طریقہ کار قراردیتے ہوئے پورے ملک میں اس کی مدت چار مئی سے مزید دو ہفتے تک بڑھانے کا فیصلہ کیا ہے۔
وزارت داخلہ کے مطابق کورونا وبا کی وجہ سے پورے ملک میں موجودہ صورت حال کی آج ایک اعلی سطحی میٹنگ میں جائزہ لیا گیا، جس کے بعد پورے ملک میں لاک ڈاؤن کی مدت دو ہفتے مزید بڑھانے کا فیصلہ کیا گیا۔ اس سے پہلے لاک ڈاؤن کی مدت 14 اپریل سے بڑھا کر تین مئی تک کی گئی تھی۔
وزارت نے اس مدت میں مختلف سرگرمیوں کو چلانے کے لیے نئی ہدایات بھی جاری کی ہیں جس کا نفاذ چار مئی سے ہوگا۔ یہ ہدایات مختلف اضلاع کے ریڈ، اورینج، گرین زون میں کورونا وائرس کے انفیکشن کے خطرے کی بنیاد پر تیار کیے گئے ہیں۔ ان میں گرین اور اورینج زون میں آنے والے اضلاع کے لیے کافی چھوٹ دی گئی ہے۔
وزیراعظم نریندر مودی نے گزشتہ پیر کو سبھی ریاستوں کے وزرائے اعلی کے ساتھ ویڈیو کانفرنسنگ کے ذریعہ میٹنگ کی تھی۔ اس میٹنگ میں کچھ ریاستوں نے لاک ڈاؤن کی مدت بڑھانے کا مشورہ دیا تھا۔
اسکے بعد وزارت داخلہ نے بھی ایک میٹنگ میں صورت حال کا باضابطہ جائزہ لینے کے بعد کہا تھا کہ لاک ڈاؤن سے متعلق چار مئی سے نئی ہدایات جاری کی جائیں گی۔
