مزدور لیڈر امرجیت کور نے پیر کے روز یہاں ایک بیان میں کہا کہ 8 اور 9 اگست کے دوران، ملک بھر میں اپنے حقوق کی لڑائی لڑنے والے مزدوروں کے خلاف متعدد ایف آئی آر درج کی گئی ہیں۔ یہ ایف آئی آر دہلی، تمل ناڈو، آندھرا پردیش، اترپردیش، مہاراشٹر، تلنگانہ، پنجاب، بہار اور جھارکھنڈ میں درج کی گئی ہیں۔
مرکزی مزدور تنظیموں نے وزیر داخلہ امیت شاہ کے نام ایک خط میں لکھا ہے کہ ملک بھر کے مزدور مزدوری کی پالیسیوں، عوامی شعبے کی کمپنیوں میں سرمایہ کی کٹوتی اور ان کی پرائیویٹائزیشن کے خلاف اور کورونا وائرس کے خلاف پہلی صف میں جنگ لڑنے والے واریئرس ڈاکٹروں، نرسوں، تکنیکی عملہ، صفائی ملازمین، کارپوریشن کے اہلکاروں، آشا کارکنوں، آنگن واڑی اور مڈ ڈے میل کے کارکنوں کے حقوق کی حمایت میں پرامن مظاہرے کررہے تھے۔ کورونا وائرس کی وبا کے دوران مزدوروں کے خلاف حکومت کے اقدامات سے پریشان حال لوگ سراپا احتجاج ہیں۔
ان مزدور تنظیموں میں انڈین نیشنل ٹریڈ یونین کانگریس، آل انڈیا ٹریڈ یونین کانگریس، ہند مزدور سبھا، سنٹر فار ٹریڈ یونین، آل انڈیا یونین کانگریس، ٹریڈ یونین کانگریس کمیٹی، سیلف ایمپلائر ویمن ایسوسی ایشن، یونائیٹڈ ٹریڈ یونین کانگریس، آل انڈین سنٹرل کونسل آف ٹریڈ یونینس اور لیفٹ پیپلز فرنٹ شامل ہیں۔
مزدور لیڈروں نے کہا کہ جمہوریت کے مفاد میں مزدوروں، مزدور لیڈروں اور کارکنوں کے خلاف درج تمام ایف آئی آر کو فوری طور پر واپس لینے کی ہدایت دی جائے۔
خط کے مطابق مظاہرہ کرنے والے تمام لوگوں نے ماسک پہن رکھے تھے اور محفوظ سماجی فاصلے کی ہدایت پر پوری طرح عمل پیرا تھے۔ اس کے باوجود ان کے خلاف ملک بھر میں ایف آئی آر درج کی گئی ہے۔ خط میں کہا گیا ہے کہ یہ حکومت کا انتقامی اقدام اور مزدوروں کے جمہوری حقوق کو کچلنے کی کوشش ہے، جسے ہرگز قبول نہیں کیا جا سکتا ہے۔
