دہلی میں آج تمام سیاسی جماعتوں کی جانب سے روڈ شوز اور چھوٹے چھوٹے جلسوں کا اہتمام کرنے پر زور دیا جا رہا ہے تاکہ لوگوں تک رسائی کو آسان بنایا جا سکے اور اپنی بات ان تک پہنچائی جا سکے۔
دہلی کے وزیر اعلی اروند کیجریوال آج روڈ شو کریں گے، وزیر داخلہ امت شاہ جلسے سے خطاب کریں گے تو بی جے پی کے قومی صدر جے پی نڈا روڈ شو کریں گے۔
وہیں بھوجپوری اداکار دنیش لال یادو گلی کوچوں میں جا کر مقامی لوگوں سے ملیں گے اور بی جے پی کے لیے لوگوں سے ووٹ دینے کی اپیل کریں گے۔
گریٹ کھلی بھی آج دہلی کی سڑکوں پر اتر کر بی جے پی کے لیے انتخابی تشہیر کریں گے۔
ہریانہ کے وزیر اعلی منوہر لال کھٹر، مملکتی وزیر نتیا نند رائے وغیرہ جلسے اور روڈ شو کریں گے۔
دلچسپ بات یہ ہے کہ دہلی کی سیاسی جنگ میں بی جے پی کے کئی قد آور رہنما آج دہلی کی گلیوں اور کوچوں سمیت سڑکوں پر بی جے پی کا دم خم دکھائیں گے۔
مملکتی وزیر انوراگ ٹھاکر ایک بار پھر سے پارٹی کے لیے آج آخری بار انتخابی تشہیر کریں گے، قبل ازیں مرکزی الیکشن کمیشن نے انوراگ ٹھاکر پر 48 گھنٹے کی پابندی عائد کردی تھی۔
انوراگ ٹھاکر نے عوامی جلسے میں متنازع نعرہ (دیش کے غداروں کو گولی مارو۔۔۔) لگوائے تھے جس کے بعد الیکشن کمیشن نے کارروائی کی تھی۔
