لالو یادو کب تک جیل میں رہیں گے؟

بہارکے سابق وزیراعلی و سابق وزیر ریل لالو پرساد یادو کو چائباسا ٹریژری معاملے میں ضمانت تو مل گئی، لیکن وہ جیل سے باہر نہیں آسکیں گے۔ کیوں کہ 'دمکا ٹریژری' سے غیر قانونی نکاسی کے معاملے میں سماعت پوری نہیں ہونے تک وہ جیل سے باہر نہیں آپائیں گے۔

مشہور چارہ گھوٹالہ معاملے میں سز ا کاٹ رہے راشٹریہ جنتادل ( آرجے ڈی ) کے صدر لالو پرساد یادو کو 'چائباسا ٹریژری' سے غیر قانونی نکاسی معاملے میں ضمانت ملنے کے بعد بھی وہ فی الحال جیل سے باہر نہیں آسکیں گے، جس کی وجہ سے بہار اسمبلی انتخاب میں اپنے اعلیٰ رہنما کی راہ دیکھ رہے آرجے ڈی کی امیدوں پر پانی پھر گیا ہے۔

جھارکھنڈ ہائی کورٹ میں جسٹس اپریش کمار کی عدالت نے آر جے ڈی صدر لالو یادو کی جانب سے چائباسا ٹریژری سے غیر قانونی نکاسی معاملے میں دائر کی گئی ضمانت کی عرضی پر جمعہ کو سماعت کے بعد انہیں ضمانت دے دی ہے۔ ساتھ ہی عدالت نے لالو یادو کو زیریں عدالت میں دولاکھ روپے جمع کرنے اور رانچی کے راجندر انسٹی ٹیوٹ آف میڈیکل سائنسز ( ریمس ) کو 6 نومبر تک لالو یادو کی میڈیکل رپورٹ داخل کرنے کی ہدایت دی ہے۔

لالو یادو کی جانب سے پیش ہوئے وکیل نے عدالت سے درخواست کی کہ' چائباسا ٹریژری سے غیر قانونی نکاسی معاملے میں لالو یادو نے آدھی سزا پوری کرلی ہے۔ اس بنیاد پر انہیں ضمانت دی جائے'۔

عدالت نے سماعت کے بعد اس معاملے میں لالو یادو کی ضمانت کی عرضی منظور کرلی۔ لیکن، 'دمکا ٹریژری' سے غیر قانونی نکاسی کے معاملے میں سماعت پوری نہیں ہونے تک وہ جیل سے باہر نہیں آپائیں گے۔