آر جے ڈی سپریمو لالو پرساد یادو کے جیل سے کال کرنے کا معاملہ اب مزید طول پکڑتا جا رہا ہے، موصولہ اطلاعات کے مطابق این ڈی اے کے اراکین اسمبلی کو فون کر کے انہیں عہدے کی پیشکش کیے جانے کی باتیں سامنے آرہی ہیں۔ این ڈی اے کے متعدد رہنما سامنے آ رہے ہیں اور لالو یادو کے ساتھ گفتگو کے بارے میں معلومات دے رہے ہیں۔
ذرائع کے مطابق لالو پرساد نے وی آئی پی کے سربراہ مکیش ساہنی کو بھی فون کیا تھا اور فون کے ذریعے لالو یادو نے مکیش ساہنی کو نائب وزیر اعلی کے عہدے کی پیشکش کی۔ الزامات یہاں تک لگائے جا رہے ہیں کہ لالو یادو نے وی آئی پی سے کہا کہ ان کے چار اراکین اسمبلی ان کی حمایت کریں یا پھر اسمبلی اسپیکر کے انتخابات کے دوران ان کے اراکین اسمبلی موجود نہیں رہیں۔
دراصل سابق نائب وزیر اعلی سشیل کمار مودی نے ٹویٹ کیا 'لالو یادو رانچی سے این ڈی اے کے اراکین اسمبلی کو فون کر رہے ہیں، وہ انہیں وزیر بنانے کا وعدہ کر رہے ہیں، سشیل کمار مودی نے دعوی کیا کہ جب انہوں اس موصولہ نمبر پر فون کیا تو لالو یادو نے فون اٹھایا، مودی کہتے ہیں 'میں نے ان سے کہا کہ جیل سے یہ گھناؤنا کام نہ کرو، آپ اس میں کامیاب نہیں ہوں گے، سشیل مودی نے ٹویٹ کر کے ایک نمبر بھی جاری کیا ہے۔'
اسی دوران جس طرح سے حکمراں جماعت کے اراکین نے قانون ساز اسمبلی کے اسپیکر کے انتخاب پر اثر انداز ہونے کے معاملے کو لے کر نکتہ چینی شروع کر دی ہے، نائب وزیر اعلی تارکشور پرساد نے کہا ہے کہ پورے معاملے کی اعلی سطح کی تحقیقات کی جائے گی۔'
