انڈین پریمیئر لیگ کی سب سے کامیاب ٹیم چینئی سپر کنگز اپنے گزشتہ دو مقابلوں میں شکست کے بعد آج دوبارہ جیت کی راہ پر آنے کی کوشش کرے گی اور اپنے گھریلو میدان پر سنرائزرس حیدرآباد سے پچھلی شکست کا حساب بیباک کرنے اور پلے آف میں جگہ پکی کرنے کے مقصد سے اترے گی۔
چینئی کو اپنے پچھلے مقابلے میں رائل چیلینجرز بنگلور کے ہاتھوں ایک رن سے شکست ہوئی تھی جبکہ اس سے قبل اسے حیدرآباد کے ہاتھوں شکست سے دوچار ہونا پڑا تھا۔
پچھلے میچ میں کپتان دھونی نے ٹیم کو مصیبت سے نکال کر جیت کی دہلیز پر لا کھڑا کیا تھا لیکن میچ کی آخری گیند پر ٹیم کو شکست سے نہیں بچا سکے، انہوں نے اپنی طوفانی بلے بازی سے مخالف ٹیموں کے لیے خطرے کی گھنٹی بجا دی ہے، انہوں نے تنہا جدو جہد کرتے ہوئے 48 گیندوں میں 84 رنز بنائے تھے، آج بھی ان سے ایسی ہی بلے بازی کی امید ہے، جبکہ گیند بازی میں عمران طاہر اور دیپک چہر مسلسل بہترین گیند بازی کر رہے ہیں۔
دوسری جانب سن رائزرس حیدرآباد کے لیے سلامی جوڑی مخالف ٹیم کے لیے انتہائی خطر ناک بنتی جا رہی ہے، ڈیوڈ وارنر اور جانی بیریسٹو تیزی سے رن بنا رہے ہیں، ایک سال کی پابندی کے بعد شاندار واپسی کرنے والے ڈیوڈ وارنر ٹورنامنٹ میں سب سے زیادہ رن بنانے والے بلے باز ہیں، انہوں نے اب تک 9 میچوں میں ایک سنچری اور 6 نصف سنچری کے ساتھ 517 رنز بنائے ہیں، جبکہ اپنا پہلا آئی پی ایل کھیل رہے جانی بیریسٹو نے بھی شاندار بلے بازی سے سب کو انگشت بدنداں کر دیا ہے اور 9 میچوں میں 445 رنز بنا چکے ہیں۔
چینئی سپر کنگز کے گیندبازوں کے لیے وارنر اور بیریسٹو کو روکنا سب سے بڑا چیلینج ہوگا۔
گیندبازی میں حیدرآباد کافی متوازن ہے، محإد نبی، راشد خان، خلیل احمد، بھونیشور کمار اور سدھارتھ کول جیسے بہترین گیند باز ہیں لیکن چینئی کی بلے بازی آرڈر کے آگے انہیں بڑا چیلینج ہوگا۔
آج کا میچ چینئی کے ایم اے چدمبرم اسٹیڈیم میں رات آٹھ بجے کھیلا جائے گا۔
