ریاست بہار کے ضلع ارریہ میں علی گڑھ مسلم یونیورسٹی الیومنائی ایسویشن ارریہ کی جانب سے آزاد نگر واقع گرلز آئیڈیل اکیڈمی کے احاطہ میں این آر سی اور ترمیم شدہ قانون شہریت کے خلاف ایک سمپوزیم کا اہتمام کیا گیا.
جس میں شہر کے معزز دانشوران کے علاوہ وکلاء، سماجی کارکن اور سیاسی لیڈران شامل ہوئے اور مرکزی حکومت کے ذریعہ لائے گئے مذکورہ قانون کے نقصانات پر اہم گفتگو کی۔
پروگرام کی صدارت سینئر ایڈووکیٹ طاحہ خاموش نے کی جبکہ نظامت کے فرائض کیریئر گائیڈ اکیڈمی کے ڈائریکٹر سفیان احمد علیگ و گرلز آئیڈیل اکیڈمی کے ڈائریکٹر پروفیسر ایم اے ایم مجیب نے مشترکہ طور پر انجام دئے.
استقبالیہ خطاب میں ایسو سی ایشن کے جنرل سیکرٹری ایڈووکیٹ مجاہد نے کہا کہ آج ضرورت ہے کہ اس بل پر تفصیلی گفتگو ہو اور مرکزی حکومت کے ذریعہ لائے گئے اس سیاہ قانون کے بارے میں لوگوں کو معلومات ہو، مرکزی حکومت کے ذریعہ اس قانون کے منفی اثرات نہ صرف مسلمانوں پر بلکہ ہندو بھائیوں خاص طور پر غریب، پسماندہ اور دلت طبقات کے لوگوں پر پڑیں گے۔، کیونکہ ان کے پاس کسی طرح کا کوئی دستاویز نہیں ہے، جب زمین ہی نہیں تو دستاویز کہاں سے لائیں گے مگر اس کا مطلب یہ نہیں کہ وہ اس ملک کی شہری نہیں.
اس موقع پر دارالقضاء امارت شرعیہ ارریہ کے قاضی شریعت قاضی مولاناعتیق اللہ رحمانی نے کیا کہا کہ اس وقت ضرورت ہے ہمیں متحد ہوکر اس سیاہ قانون کی مخالفت کریں، ہمارے انتشار کا ہی فائدہ اٹھاکر اس بل کو لایا گیا ہے، ہمارے حقوق کی پامالی ہو رہی ہے جسے کسی بھی قیمت پر برداشت نہیں کیا جائے گا.
مقرر خصوصی ایڈووکیٹ ایل پی نائک نے کہا کہ اس سیاہ بل کی ہر چہار جانب مخالفت ہو رہی ہے باوجود اس کے اس بل کو واپس نہیں لیا جانا اس بات کو ظاہر کرتا ہے کہ یہ حکومت ہمیں اور آپ کو اسی ہندو مسلم مسئلہ پر الجھائے رکھنا چاہتی ہے تاکہ حکومت سے اس کی ناکامی پر کوئی سوال نہ کرے، مگر ہمیں زمین سے جڑے ہر اس شخص کو بیدار کرنا ہوگا اور حکومت کے اس چال کو سمجھانا ہوگا ورنہ اس ملک کو پھر سے تقسیم پونے سے کوئی نہیں روک سکتا.
صدارتی خطاب میں ایڈووکیٹ طاحہ خاموش نے کہا کہ جنگ آزادی میں مسلم کے ساتھ برادران وطن نے بھی اپنی قربانیاں پیش کی ہے، اس ملک میں دونوں ایک دوسرے کے بغیر نامکمل ہے، بھارتی جمہوریت کی یہی خوبصورتی ہے کہ بھارت میں مختلف مذاہب کے لوگ رہتے ہوئے بھی ایک ہیں مگر حکومت سیاست کی روٹی سیکنے کے لیے ہمارے درمیان تفریق پیدا کرتی ہے۔جسے کسی بھی صورت میں یہاں امن پسند لوگ کامیاب نہیں ہونے دیں گے.
اس ضمن میں کسی شاعر نے کیا خوب کہا ہے کہ
ہندو مسلم سکھ عیسائی ایک مالہ کے منکے ہیں
اور آپس کے یہ کینے جھگڑے دھندھے پاگل پن کے ہیں۔
پروگرام سے جن لوگوں نے خطاب کیا ان میں سبطین احمد، کے این وشواس، ایڈووکیٹ صدر عالم، پرویز عالم علیگ، عفان کامل علیگ، حیدر یاسین، ایڈووکیٹ دیوندر سنگھ، رضی احمد، ڈاکٹر نیر حبیب وغیرہ کے نام شامل ہیں.
