بھارت کے وزیراعظم نریندر مودی نے بھارت - چین کشیدگی اور بھارت سرحدی تناؤ پر تبادلہ خیال کرنے کے لئے آل پارٹی میٹنگ بلائی ہے۔ یہ ورچول میٹنگ 19 جون پانچ بجے ہو گی اور اس میں سبھی سیاسی پارٹیوں کے صدور موجود رہیں گے۔
اس سلسلہ میں پی ایم او انڈیا ٹویٹر ہینڈل سے ایک ٹویٹ کیا گیا جس میں یہ جانکاری دی گئی۔ ٹویٹ میں لکھا گیا: 'سرحد پر بھارت - چین کشیدگی پر تبادلہ خیال کرنے کے لیے وزیراعظم نریندر مودی نے 19 جون 5 بجے آل پارٹی میٹنگ طلب کی ہے جس میں سبھی سیاسی جماعتوں کے صدور شرکت کریں گے۔'
اس سے قبل اقوام متحدہ کے سکریٹری جنرل انتونیو گتریس نے لداخ میں لائن آف ایکچول کنٹرول (ایل اے سی) پر بھارت اور چین کے مابین تنازعات پر تشویش کا اظہار کیا ہے اور دونوں ممالک سے اپیل کی ہے کہ وہ تحمل سے کام لیں، اقوام متحدہ کے ترجمان ایری کینیکو نے کہا 'ہمیں لائن آف ایکچول کنٹرول پر بھارت اور چین کے مابین تشدد اور اموات کی خبروں پر تشویش ہے'، دونوں اطراف سے اپیل ہے کہ وہ انتہائی تحمل کا مظاہرہ کریں۔
