مجلس اتحاد المسلین کے رکن پارلیمان امتیاز جلیل کی رواں برس کے عام انتخابات میں غیر معمولی کامیابی پر اورنگ آباد شہر میں جشن کا اہتمام کیا گیا۔
جشن میں اورنگ آباد شہر کے ہزاروں افراد نے شرکت کی۔ امتیاز جلیل نے اپنی کامیابی کا سہرہ دلتوں، مسلمانوں اور سیکولر ہندووں کے سر باندھا۔
اس موقع پر آزاد چوک سے بھڑکل گیٹ تک ایک ریلی نکالی گئی جس میں شہر اور اطراف کے ہندو، مسلمان اور دلت طبقے کے افراد نے شرکت کی۔
متعدد جگہوں پر امتیاز جلیل کی گلپوشی کی گئی، اور ان پر پھول بھی برسائے گئے۔
اس جشن کو اورنگ آباد کی تاریخ میں اپنی نوعیت کا منفرد جشن کہا جاسکتا ہے، جس کے ذریعے ایم آئی ایم نے ایک بار پھر اپنی سیاسی طاقت کا عملی مظاہرہ کیا ہے۔
غور طلب ہے کہ رواں برس ہونے والے عام انتخابات میں امتیاز جلیل نے مہاراشٹر کے اورنگ آباد پارلیمانی حلقے سے شیو سینا کے امید وار چندر کانت کھیرے کو بڑے فرق سے شکست دے کر پہلی بار رکن پارلیمان منتخب کیے گئے۔
امتیاز جلیل ماضی میں ایک صحافی کے طور پر اپنی خدمات انجام دے رہے تھے۔ وہ معروف ٹی وی چینل این ڈی ٹی وی سے تقریبا 12 برسوں تک منسلک تھے۔
اپنے صحافتی زندگی کے دوران متعدد بار امتیاز جلیل کی ملاقات ایم آئی ایم کے سربراہ اسددالدین اویسی سے ہوئی۔ بالآخر اسددالدین اویسی نے امتیاز جلیل سے متاثر ہو کر انہیں سیاسی میدان میں اترنے کا مشوہ دیا۔
ابتدائی طور پر اویسی نے انہیں مہارشٹر کے اورنگ آباد میں ایم آئی ایم کو مضبوط کرنے کی ذمہ داری سونپی۔ اس ذمہ داری کو امتیاز جلیل نے بخوبی انجام دیا۔ جس کے نتیجے میں اورنگ آباد کے مقامی انتخاب میں ایم آئی ایم کو شاندار کامیابی ملی۔
ان کی اس کامیابی کے پیش نظر انہیں رواں برس کے عام انتخابات میں ایم آئی ایم کے ٹکٹ پر اورنگ آباد پارلیمانی حلقے سے امیدوار نامزد کیا گیا، جس میں انہوں نے کامیابی حاصل کر کے شیو سینا کے مضبوط ووٹ بینک کو کمزور کر دیا۔
