رانے نے ٹوئٹ کیا کہ 'ممبئی سے راجدھانی ایکسپریس کے ذریعہ سنیچر کو گوا پہنچے گیارہ مسافر ٹونیٹ ٹیسٹ میں کورونا وائرس سے متاثر پائے گئے ہیں جس سے گوا میں کورونا کے فعال مریضوں کی تعداد بڑھ کر 50 ہو گئی ہے'۔
وزیر صحت نے کہا کہ 'ریاست میں کورونا وائرس کے بڑھتے معاملات پر وہ وزیراعلی پرمود ساونت سے ملاقات کر کے انہیں موجود صورتحال سے واقف کرائیں گے اور اسے روکنے کی کوششوں پر بات چیت کریں گے'۔ رانے نے کورونا وائرس کے معاملات میں اضافہ کے لئے ریلوے، روڈ ٹرانسپور ٹ اور دیگر راستوں کے ذریعہ گوا میں داخل ہورہے لوگوں کو ذمہ دار ٹھہرایا ہے۔
رانے نے کہا کہ 'ہم وزیراعلی سے درخواست کریں گے کہ گوا میں داخلہ کرنے والے مسافروں کے لئے کووڈ۔19 ٹیسٹ نگیٹیو سرٹی فکیٹ لازمی کیا جائے اور یہ سرٹی فکیٹ جاری ہونے کی تاریخ سے اگلے 48 گھنٹوں کے لئے ویلڈ ہونا چاہئے۔ ہم اپنے وزیراعلی کی قیادت میں کووڈ۔19 کے چیلنج سے متحد ہو کر لڑیں گے'۔
