علی گڑھ میں مسلم یوتھ ایسوسی ایشن کے صدر نے مرکزی وزیر خزانہ کو ایک خط لکھا جس میں انہوں نے 500 کے نوٹ پر ساورکر 100 کے نوٹ پر سبھاش چندر بوس اور 50 کی نوٹ پر بھگت سنگھ کی تصویر لگانے کا مطالبہ کیا۔
مسلم یوتھ ایسوسی ایشن کے صدر محمدعامر راشد نے کہا کہ 'بھارتی تاریخ کے اندر ایک پوشیدہ انقلابی ساورکر نے ملک کی آزادی میں اہم کردار ادا کیا وہ کانگریس سے نہیں تھے، لہذا کانگریس اور کمیونسٹ نظریہ کے لوگوں نے انہیں دباؤ میں رکھا۔ ساورکر نے لندن میں ملک کی آزادی کے لیے آواز اٹھائی۔ جس کے بعد انگریز گھبرائے اور انھیں کالا پانی کی سزا دی'۔
محمدعامر راشد نے کہا ہے کہ 'ساورکر سزا کے دوران کوہلو چلاتا تھے اور 16 لیٹر تیل نکالتے تھے ملک کی آزادی کے لئے انھوں نے بہت نقصان اٹھاۓ'۔
محمد عامر نے مزید کہا 'یہ بہت بدقسمتی کی بات ہے جب ملک کی آزادی کی تحریک چل رہی تھی اس وقت وہ لوگ جو کانگریس سے وابستہ تھے جو چوری دھوکا اور ڈکیتی کے مقدمات میں جیل میں بند تھے آج تک 'آزادی کی پینشن' حاصل کر رہے ہیں'۔
انھوں نے مزید کہا ہے کہ اب ملک میں قوم پرستوں کی حکومت ہے یہی وجہ ہے کہ ہم نے ملک کے وزیر خزانہ سے مطالبہ کیا ہے کہ ملک کی کرنسی 500 کے نوٹ پر ساورکر کی تصویر 100 کے نوٹ پر سبھاش چندر بوس اور 50 کے نوٹ پر بھگت سنگھ کی تصویر لگائی جائے'۔
