کورونا وائرس سے بچاؤ کے لیے جس لاک ڈاون کو مسلسل کئی ہفتوں تک سختی سے نافذ کیا گیا تھا، اسے اب اقتصادی بحران کے مد نظر کھول دیا گیا۔ لاک ڈاون کھولنے کے پہلے روز دہلی کی سڑکوں پر گاڑیاں دوڑتی نظر آئیں، مسجدوں کے دروازے کھل گئے اور مندروں میں درشن کا آغاز ہوگیا۔
ای ٹی وی بھارت کے نمائندے نے دہلی کے کئی اہم مقامات پر پہنچ کر جائزہ لیا تو اندازہ ہوا کہ رونق واپس لوٹنے کی شروعات ہونے لگی ہے۔ دہلی کے دل کہے جانے والے ' کناٹ پلیس' میں بہت معمولی سرگرمیاں نظر آئیں۔ اسی سے متصل معروف پراچین ہنومان مندر میں عقیدت مند درشن کرتے نظر آئے۔ مندر میں پجاری نے پوجا کی شروعات کردی ہے اور تمام تر احتیاطی تدابیر اختیار کئے جارہے ہیں۔
وہیں شاہی جامع مسجد میں بھی نمازی آتے نظر آئے۔ مغرب کی نماز میں تقریبا 50 سے زائد نمازی آئے جنہیں دروازہ پر چیک کیا گیا۔ بعد ازاں انہیں اندر جانے کی اجازت دی گئی۔
