ریزرو پولیس لائن میں’پولیس اسمرتی دیوس پریڈ‘ کے موقع پر یوگی نے شہید پولیس اہلکاروں کو خراج عقیدت پیش کرنے کے بعد کہا کہ' عوام کے لیے تحفظ کا جذبہ پیدا کرنا اور جرائم پیشہ افراد کے اندر قانون کا خوف پیدا کرنا حکومت کی اولین ترجیح ہے'۔
اترپردیش کے وزیر اعلی یوگی آدتیہ ناتھ نے دعویٰ کیا ہے کہ 'حکومت نے جرائم پیشہ افراد کے خلاف زیرو ٹالیرنس کی پالیسی پر عمل کرتے ہوئے اب تک ریاست میں 96 افراد پولیس انکاونٹر میں مارے گئے ہیں جبکہ 1961 زخمی ہوئے ہیں۔ اس دوران 10 ہزار 225 مجرموں کو گرفتار کیا گیا ہے۔ جن میں سے 6759 انعامی مجرم ہیں'۔
وزیر اعلی نے کہا کہ 'موجود وقت میں ریاست میں کوئی ایسا ایک بھی ملزم نہیں، جو جیل کے باہر کھلے میں گھوم رہا ہو۔ ایسے ملزموں کو یا تو جیل بھیج دیا گیا ہے یا تو وہ پولیس کاروائی میں مارے گئے ہیں۔ اس دوران حالانکہ پولیس کے پانچ جوان بھی شہید ہوئے اور 752 پولیس اہلکار زخمی ہوئے'۔
انہوں نے مزید کہا کہ 'پولیس کی کاروائی سے سبھی طبقات خاص کر تاجروں، خواتین، بچیوں میں تحفظ کا احساس پیدا ہوا ہے۔ اس مدت میں مختلف اضلاع میں 39 نئے تھانوں اور 15 نئی چوکیاں قائم کی گئی ہیں۔ریاستی پولیس کے سامنے نظم و نسق کے متعدد مسائل آئے جنہیں ایک چیلنج کے طور پر قبول کرتے ہوئے اس سے نپٹا گیا'۔
