دہلی میں کملیش بھٹ کے رشتہ دار وملیش بھٹ نے بتایا کہ 22 اور 23 اپریل کی رات اتحاد پرواز کے ذریعہ کملیش کی لاش کو ابوظہبی سے دہلی لایا گیا تھا لیکن دہلی ایئرپورٹ پر امیگریشن بیورو کے عہدیداروں نے کملیش کی لاش کو واپس ابوظہبی بھیج دیا۔
امیگریشن بیورو کے رویہ کے خلاف وملیش بھٹ نے دہلی ہائیکورٹ کا دروازہ کھٹکھٹایا ہے۔
وملیش بھٹ نے امیگریشن عہدیداروں پر الزام لگایا کہ انہوں نے کملیش سمیت تین ہندوستانی شہریوں کی لاشوں کو اتحاد پرواز سے اترنے نہیں دیا اور وہ اس سلسلہ میں وزارت داخلہ کی جانب سے جاری کردہ احکامات دکھانے سے بھی قاصر تھے۔
اسی دوران وزارت داخلہ نے ہفتہ کو ایک بیان جاری کرتے ہوئے کہا کہ بیرون ملک کورونا وائرس سے مرنے والے ہندوستانی شہریوں اور او آئی سی کارڈ ہولڈرس کی لاشیں وطن واپس لائی جاسکتی ہیں اور اس سلسلہ میں متعلقہ رہنمایانہ خطوط پر سختی سے عمل آوری کی جائے گی۔ بیان کے مطابق وزارت داخلہ اور وزارت صحت کی جانب سے لاش لانے کے سلسلہ میں نوآبجکشن سرٹیفیکٹ لازمی ہوگا۔
