مرکزی وزارت صحت کی جانب سے جاری تازہ اعداد و شمار کے مطابق ملک میں کورونا وائرس سے متاثر افراد کی تعداد 81970 ہو گئی ہے، ان میں 51401 فعال کیسز ہیں لیکن راحت کی بات یہ ہے کہ 1685 مریضوں کی صحت مند ہونے کے بعد ایسے لوگوں کی تعداد بڑھ کر 27919 ہو گئی ہے۔ مریضوں کے صحت مند ہونے کی شرح میں بھی مسلسل اضافہ ہو رہا ہے جو جمعہ کو بڑھ کر 34.06 فیصد ہو گئی۔
مرکزی صحت اور خاندانی بہبود کے وزیر ڈاکٹر ہرش وردھن کی صدارت میں جمعہ کونرمان بھون میں وزرائے کے گروپ کی 15 ویں اعلی سطحی میٹنگ ہوئی جس میں بتایا گیا کہ ملک بھر میں کورونا وائرس کے 79 فیصد معاملے 30 میونسپل علاقوں میں ہیں۔ اس کے علاوہ سپریم کورٹ نے لاک ڈاؤن کی وجہ سے ہوئے کاروباری دنوں کے نقصان کی تلافی موسم گرما کی تعطیلات میں کمی کرکے کرنے کا جمعہ کو فیصلہ کیا۔ عدالت میں اس بار سات ہفتے کی بجائے یہ موسم گرما میں چھٹی صرف دو ہفتے رہے گی۔
ہر سال مئی کے وسط سے جولائی کے آغاز تک عدالت میں تعطیلات رہتی ہیں۔ اس بار یہ چھٹی 18 مئی سے شروع ہوکر پانچ جولائی کو ختم ہونی تھی لیکن ججوں کی جمعہ کو ہوئی میٹنگ میں طے کیا گیا کہ 19 جون تک سپریم کورٹ میں سماعت ہوتی رہے گی۔ اس طرح اس بار صرف دو ہفتے کی ہی چھٹی ہوگی۔
کورونا وائرس سے سب سے زیادہ متاثر مہاراشٹر میں 1997 نئے معاملے سامنے آنے کے بعد ریاست میں کل متاثرہ لوگوں کی تعداد 27524 ہو گئی ہے۔ ریاست میں اب تک 1019 متاثرین کی موت بھی ہو چکی ہے جس سے 44 افرادکی حال ہی میں موت ہوئی ہے۔ تمل ناڈو میں بھی کورونا وائرس کے معاملے تھم نہیں رہے ہیں اور 447 نئے معاملات کے ساتھ ریاست میں 9674 لوگ ابھی تک اس وائرس کی زد میں آ چکے ہیں اور 64 لوگوں کی جان جا چکی ہے۔
گجرات میں اس مہلک وائرس کے 407 نئے معاملات کی تصدیق ہوئی ہے اور اس دوران تقریبا 20 اور لوگوں کی بھی موت ہو گئی ہے۔ ریاست میں اب تک 9674 لوگ کورونا سے متاثر ہو گئے ہیں اور 586 متاثرین کی موت ہو گئی ہے۔
قومی دارالحکومت دہلی کی بھی پوزیشن اس جان لیوا وائرس کی وجہ سے تشویشناک بنی ہوئی ہے۔ یہاں متاثرین کی تعداد آٹھ ہزار سے زائد ہے۔ دہلی میں اب تک 8470 لوگ متاثر ہوئے ہیں اور نو مریضوں کی موت کے ساتھ مرنے والوں کی تعداد 115 تک پہنچ گئی ہے اور 3045 لوگوں کے علاج کے بعد ہسپتالوں سے چھٹی دے دی گئی ہے۔
اس کے علاوہ گوا میں گزشتہ کئی دنوں سے کورونا وائرس کا کوئی بھی نیا معاملہ سامنے نہیں آنے کے بعد ریاست میں سات نئے معاملات کی تصدیق ہوئی ہے۔ غور طلب ہے کہ ملک میں کورونا وائرس کا پہلا معاملہ 30 جنوری کو درج کیا گیا تھا۔
وزارتی گروپ نے ملک میں کورونا انفیکشن کا مقابلہ کرنے کے لئے صحت کے بنیادی ڈھانچے کے شعبے میں کیے جانے والے اضافہ کے بارے میں بتایا کہ ملک میں اس وقت 8694 صحت کی سہولیات سمیت 919کووڈ ہسپتال ہیں۔ اس کے علاوہ 2036 کووڈ ہیلتھ سینٹر اور 5739 کووڈ کیئر سینٹر ہیں جن میں بہت سنگین مریضوں کے لئے 277429 بستر، 29701 آئی سی یو اور 515250 گوشہ تنہائی بستر ہیں۔
ملک میں آج تک 18855 وینٹی لیٹر ہیں اور مرکزی حکومت نے 84.22 لاکھ این 95 ماسک اور 47.98 پی پی ای کٹ کو مختلف ریاستوں اور مرکز کے زیر انتظام خطوں اور مرکزوی اداروں کو تقسیم کیا ہے۔
ملک کی سب سے بڑی ریاست اترپردیش میں پرکورونا وائرس کے معاملے بڑھ کر چار ہزار کے قریب ہو گئے ہیں۔ تازہ اعداد و شمار کے مطابق اتر پردیش میں متاثرین کی تعداد بڑھ کر جمعہ تک 3941 ہو گئی ہے لیکن راحت کی بات یہ ہے کہ ریاست میں 2080 لوگ ٹھیک بھی ہو گئے ہیں جبکہ 1773 فعال معاملے ہیں جبکہ 88 لوگوں کی موت ہو گئی ہے۔
ہریانہ میں بھی کورونا وائرس سے ایک اور متاثرہ شخص کی موت کے بعد مرنے والوں کی تعداد اب 12 ہو گئی ہے اور 827 لوگ اب تک اس وائرس کی زد میں آ چکے ہیں۔ راجستھان میں بھی کورونا وائرس تیزی سے پیر پسار رہا ہے۔ یہاں کورونا متاثرین کی تعداد 4534 تک ہو گئی ہے اور 125 لوگوں کی موت ہو چکی ہے، جبکہ 2580 لوگ مکمل طور ٹھیک ہوئے ہیں۔
مغربی بنگال میں 2377 لوگ کورونا وائرس سے متاثر ہوئے ہیں اور 215 لوگوں کی موت ہو چکی ہے اور اب تک 768 لوگ ٹھیک ہوئے ہیں۔ تلنگانہ میں اب تک کورونا سے 1414 لوگ متاثر ہوئے ہیں۔ ریاست میں جہاں کورونا سے 34 لوگوں کی جان گئی ہے، وہیں 950 لوگ اب تک ٹھیک ہوئے ہیں۔
جنوبی ہند کی ریاست آندھرا پردیش میں 2205 اور کرناٹک میں 987 لوگ متاثر ہیں اور ان ریاستوں میں اس سے مرنے والوں کی تعداد بالترتیب 48 اور 35 ہو گئی ہے۔ مرکز کے زیر انتظام صوبہ جموں و کشمیر میں متاثرین کی تعداد بڑھ کر 983 ہو گئی ہے اور 11 اموات ہوئی ہے۔ پنجاب میں 32، بہار میں سات، کیرالہ میں چار، جھارکھنڈ، چندی گڑھ اور اڑیسہ میں تین تین، ہماچل اور آسام میں دو دو اور میگھالیہ، پڈوچیری اور اتراکھنڈ میں ایک ایک شخص کی اس وبا سے موت ہوئی ہے۔
پڈوچیری کے وزیر اعلی وی نارائن سامی نے جمعہ کو یہاں بتایا کہ پڈوچیری علاقے سے ایک اور کرائکل سے ایک اور شخص کورونا وائرس کی جانچ میں نگیٹو پائے گئے ہیں اور اگر وہ آج پھر کی گئی جانچ میں نگیٹو آتے ہیں تو انہیں ہسپتال سے چھٹی دے دی جائے گی اور ریاست میں کورونا متاثرین کی تعداد گھٹ کر پانچ رہ جائے گی۔
