کانگریس کے باغی اراکین اسمبلی کی دوبارہ شکایت

ممبئی کی ہوٹل میں ٹھہرے ہوئے کرناٹک کے 14 باغی اراکین اسمبلی نے پیر کو کانگریس کے اعلیٰ رہنماؤں سے ایک بار پھر دھمکی ملنے کی شکایت درج کروائی ہے۔

پَوَئی پولیس اسٹیشن کو کرناٹک کے 14 اراکین اسمبلی نے گذشتہ پانچ دن میں دوسری بار اس طرح کی شکایت درج کروائی ہے۔ شکایت میں انہوں نے کہا کہ کانگریس کے بڑے رہنما ملک ارجن کھڑگے اورغلام نبی آزاد سمیت مہاراشٹر یا کرناٹک کے کسی بھی کانگریس کے رہنما سے نہیں ملنا چاہتے۔
اراکین نے پولیس سے گزارش کی ہے کہ ان رہنماؤں کو ان سے ملنے سے روکا جائے کیونکہ ان کے ملنے سے خطرے کا اندیشہ ہے۔ تمام باغی اراکین رینائےسنس ہوٹل میں قیام کئے ہوئے ہیں۔
اراکین نے ڈپٹی کمشنر آف پولیس کو شکایت کی ایک کاپی بھیجی ہے جس میں 14 اراکین اسمبلی کے نام لکھے ہوئے ہیں لیکن اس میں چار اراکین کے دستخط نہیں ہیں۔
دستخط کرنے والوں میں شیورام ہیبار، بی سی پاٹل، منیترم، آر شنکر، ایچ ناگیش، پتاپ پاٹل، گوپالیہ، رمیش جے، سوم شیکھر اور بسوراج شامل ہیں۔ مہیش کے، وشوناتھ، نارائن گوڑا اور ایم ٹی بی ناگراج نےدستخط نہیں کیا ہے۔
واضح رہے کہ 9 جولائی کو کرناٹک کانگریس کے تقریباً 12 اراکین اسمبلی نے اسی طرح کا خط لکھا تھا اور کرناٹک سے آنے والے کانگریس کے رہنما ڈی کے شیوکمار یا دیگر کسی بھی کانگریس رہنما سے ملنے سے انکار کر دیا تھا۔