'مودی کو ولن کی طرح پیش کرنا غلط'

کانگریس کے ترجمان ابھیشیک منو سنگھوی نے جمعہ کو کہا کہ وزیر اعظم نریندر مودی کو ولن کی طرح پیش کرنا غلط ہے اور اپوزیشن کی جانب سے ایسا کیا جانا ایک طرح سے ان کی مدد کرنا ہے ۔

سنگھوی نے کانگریسی لیڈر اور راجیہ سبھا رکن جے رام رمیش کے بیان کا حوالہ دیتے ہوئے یہ بات کہی۔ سنگھوی نے اپنی ٹویٹ میں کہا ’’میں نے ہمیشہ کہا ہے کہ مودی کو ولن کی طرح پیش کرنا غلط ہے، کیونکہ نہ صرف وہ ملک کے وزیر اعظم ہیں، بلکہ ایسا کرکے ایک طرح سے اپوزیشن ان کی مدد کرتی ہے‘‘۔

اس سے قبل رمیش نے اپنی ٹویٹ میں کہا تھا کہ وزیر اعظم نریندر مودی کی حکومت کا ماڈل ’مکمل طور منفی کہانی‘ نہیں ہے اور ان کے کام کی اہمیت کو قبول نہیں کرکے اور ہر وقت انہیں ولن کی طرح پیش کر کے کچھ حاصل نہیں ہونے والا ہے ۔