وزیر اعلیٰ نتیش کمار نے پٹنہ کے وگیان بھون میں منعقد تقریب میں ریموٹ کے ذریعہ آج ارریہ میں 'جل جیون ہریالی' کے تحت مختلف بلاک و پنچایت میں، مختلف شعبوں کے تحت کئی منصوبوں کا سنگ بنیاد رکھا، اور ساتھ ہی کئی منصوبوں کا افتتاح عمل میں آیا۔
وزیر اعلیٰ کے ہاتھوں سنگ بنیاد و افتتاح تقریب کو براہ راست دیکھنے کے لئے ارریہ کے ٹاؤن ہال میں ایک تقریب بھی منعقد کی گئی تھی، جس میں ضلع کلکٹر بیجناتھ یادو، اے ڈی ایم انیل کمار ٹھاکر، ڈی ڈی سی انعام الحق انصاری، ایس ڈی او روزی کماری سمیت ضلع کے تمام اعلیٰ افسران موجود رہے۔
ارریہ ضلع کے لئے مختلف محکموں کے جن منصوبوں کا سنگ بنیاد رکھا گیا ہے، ان میں محکمہ 'لگھو سینچائی' کے لئے 43 منصوبہ، 'محکمہ متسیہ' کے لئے چھ منصوبے، 'محکمہ کمشنری بھون' کے لیے 75 منصوبے، 'محکمہ صحت' کے لئے 13 منصوبے، نگر پریشد کے لئے 22 منصوبے اور منریگا کے تحت 996 منصوبے، یعنی کل ملا کر 1 ہزار 155 منصوبوں کی سنگ بنیاد رکھا گیا، ان منصوبوں پر تقریباً 23 کڑوڑ 49 لاکھ38 ہزار 178 روپے خرچ ہوں گے۔
ضلع کلکٹر بیجناتھ یادو نے یہ بھی بتا یا کہ'اس تقریب کا انعقاد گزشتہ دو اکتوبر یعنی گاندھی جینتی کے موقع پر ہی ہونا تھا، مگر پٹنہ میں سیلاب کی وجہ سے پروگرام ملتوی کرنا پڑا'۔
ضلع کلکٹر نے کہا کہ' ان منصوبوں کا فائدہ 'جل جیون ہریالی' کے تحت عوام کو ملے گا، حکومت اس بات کے لئے پرعزم ہے کہ شہر کے ساتھ ساتھ دیہی علاقوں کی عوام کو بھی'جل جیون ہریالی' کے تحت بیدار کیا جائے۔
'جل جیون ہریالی' ہی ایک ایسا ذریعہ ہے جہاں انسان کے ساتھ ساتھ حیوانات و نباتات کی حفاظت ہو سکتی ہے۔
