بھارتیہ جنتاپارتی کے صدر جگت پرکاش نڈا نے ملک میں ایمرجنسی کی 45 ویں برسی پر جمعرات کے روز کانگریس پر تنقید کرتے ہوئے اسے تاریخ کا سیاہ باب قرار دیتے ہوئے کہا کہ اس آمرانہ ذہنیت نے سیاسی مفاد حاصل کرنے کے لئے ملک پر ایمرجنسی مسلط کی۔
جے پی نڈا نے ٹوئٹر پر ’ایمرجنسی کا سیاہ باب‘ عنوان سے ایک پوسٹ کیا جس انہوں نے لکھا 'سنہ 1975 میں آج ہی کے دن سیاسی مفادات کی تکمیل کے لیے اس وقت کی حکومت نے ایمرجنسی کا اعلان کرکے حکومت کے خلاف بولنے والوں کو جیل میں ڈالا، ملک کے عوام کے بنیادی حقوق تلف کرکے اخباروں کے دفتروں پر تالے لگادییے گئے تھے'۔
انہوں نے مزید لکھا کہ 'کانگریس کے ذریعہ مسلط کی گئی شرمناک ایمرجنسی کی برسی پر ان سبھی محب وطن کو سلام کرتاہوں جنہوں نے ظلم اور اذیتیں برداشت کرنے کے باوجود جمہوریت کا قتل کرنے والوں کے سامنے گھٹنے نہیں ٹیکے'۔
اس وقت کی وزیراعظم اندرا گاندھی نے 25 جون 1975 کو ملک میں ایمرجنسی نافذ کر دیا، جو 21 مارچ 1977 تک جاری رہا تھا۔
نڈا نے ایک ٹوئٹ میں لکھا 'بھارت ان سبھی عظیم لوگوں کو سلام کرتا ہے جنہوں نے سخت اذیتیں برداشت کرنے کے باوجود بھی ایمرجنسی کی جم کر مخالفت کی، یہ ہمارے ستیہ گرہیوں کی جدوجہد ہی تھی جس سے بھارت کی جمہوری اقدار نے ایک آمرانہ ذہنیت پر کامیابی سے جیت حاصل کی۔
