ریاست ہریانہ کے نوح ضلع میں جن نائک جنتا پارٹی (جے جے پی) کے حامی اور بھارتیہ جنتا پارٹی کے کارکنان میں نوک جھونک کے بعد جوتم پیزار (جم کر مار پیٹ ہوئی) ہوگیا۔
در اصل بی جے پی کے امیدوار چودھری ذاکر حسین اور جے جے پی کے امیدوار طیب حسین گھاسیڑیا کو پرچہ نامزدگی داخل کرنا تھا۔ اچانک دونوں اپنے اپنے حامیوں کے ساتھ پرچہ نامزدگی بھرنے جا رہے تھے تبھی دونوں کے حامی آپس میں الجھ گئے۔
جھگڑا اس قدر بڑھ گیا کہ طیب حسین گھاسیڑیا کے حامیوں کی ایک درجن گاڑیوں کو توڑ دیا گیا۔ جھگڑے میں کئی کارکنان کو چوٹیں بھی آئی ہیں۔ اس دوران نیشنل ہائی وے سے گزر رہے عام راہ گیروں کی گاڑیوں کو بھی نقصان پہنچا ہے۔
حالات کی سنگینی کے پیش نظر شہر میں پولیس جوانوں کو تعینات کر دیا گیا اور حالات کو قابو میں کرلیا گیا۔
یاد رہے کہ نوح اسمبلی سیٹ سے اس مرتبہ کانگریس سے آفتاب احمد، بی جے پی سے ذاکر حسین، جے جے پی سے طیب حسین گھاسیڑیا، انڈین نیشنل لوک دل سے ناصر حسین، بی ایس پی سے ڈاکٹر شارق حسین، سوراج انڈیا سے یحی سیفی امیدوار ہیں۔
