بھگت سنگھ اور اودھم سنگھ کو ’بھارت رتن‘ دینے کا مطالبہ

راجیہ سبھا میں منگل کو ارکان نے شہید بھگت سنگھ اور جلیانوالہ باغ کے قتل عام کا بدلہ لینے والے سردار اودھم سنگھ کو بھارت رتن سے نوازا نے کا مطالبہ کیا۔

کانگریس کے پرتاپ سنگھ باجوا نے جلیانوالہ باغ قومی یادگار (ترمیمی) بل 2019 پر بحث کے دوران بھگت سنگھ کو بھارت رتن سے نوازے جانے کی مانگ کی۔ ان کی حمایت شرومنی اکالی دل کے بلوندر سنگھ بھوندر نے بھی کی اور کہا کہ سردار اودھم سنگھ کو بھی بھارت رتن سے نوازا جانا چاہیے۔

باجوا نے کہا کہ جلیانوالہ یادگاری ٹرسٹ سے کانگریس صدر کو نہیں ہٹایا جانا چاہیے اور مقامی ممبر اسمبلی کو بھی اس کا رکن بنایا جانا چاہیے۔ انہوں نے کہا کہ جلیانوالہ باغ کی تاریخ کانگریس سے منسلک ہے۔

واضح رہے سال 1919 میں اپریل مہینے میں بیساکھی کے دن برطانوی حکومت کے دوران جلیانوالہ باغ میں جنرل ڈائر کے حکم پر سینکڑوں نہتے لوگوں کو گولیوں سے بھون دیا گیا تھا۔