وزیر اعظم نریندر مودی اور بھارت کے دورہ پر آنے والی بنگلہ دیش کی وزیر اعظم شیخ حسینہ کے درمیان حیدرآباد ہاؤس میں وفد کی سطح پر دوطرفہ بات چیت میں کئی معاہدے پر دستخط کیے گئے۔
ان میں چٹ گاؤں اور منگلا بندرگاہوں کو چلانے کے معیاری طریقہ کار، فینی ندی سے تری پورہ کے شہر سبروم کے لیے پینے کے پانی کی فراہمی کے واسطے 1.82 کیوسک پانی کا استعمال اور سمندری ساحل کی حفاظت کی نگرانی کے ساتھ ہی حیدرآباد اور ڈھاکہ یونیورسٹیوں کے مابین تبادلہ، ثقافتی نوجوان امور میں تبادلہ اور آسان شرطوں پر قرض کا معاہدہ بھی شامل ہے۔
دونوں وزرائے اعظم نے ویڈیو کانفرنسنگ کے ذریعے بھارت میں بنگلہ دیش سے ایل پی جی گیس کی درآمد، پیشہ ورانہ تجارتی تربیت اور معاشرتی سہولت سے متعلق تین منصوبوں کا افتتاح کیا۔
اس موقع پر ، مسٹر مودی نے کہا کہ گذشتہ ایک سال میں ہم نے نو منصوبوں کو ویڈیو روابط کے ساتھ شروع کیا ہے۔ ہم نے آج کے تین منصوبوں کو ملا کر ایک سال میں درجن بھر مشترکہ منصوبے شروع کیے ہیں۔
