ڈھاکہ: بنگلہ دیش اور سری لنکا کے مابین ورلڈ ٹیسٹ چمپیئن شپ کے تحت تین ٹیسٹ میچز کی سیریز جولائی اگست میں ہونی تھی لیکن کورونا وائرس کے پھیلنے کی وجہ سے ملتوی کر دی گئی تھی۔
یہ سیریز اب بنگلہ دیش کرکٹ بورڈ (بی سی بی) اور سری لنکا کرکٹ (ایس ایل سی) کے مابین زیربحث ہے اکتوبر میں اس کا دوبارہ شیڈول ہونا ہے۔
انٹرنیشنل کرکٹ کونسل (آئی سی سی) کے اس سال آسٹریلیا میں ہونے والے ٹی 20 ورلڈ کپ کو ملتوی کرنے کے فیصلے کے بعد دونوں بورڈز کسی بھی مقررہ ونڈو میں سیریز کے انعقاد کے حق میں ہیں۔
بی سی بی کے چیف ایگزیکٹو آفیسر نظم الدین چودھری نے کہا کہ 'آئی سی سی کے تین سالوں میں لگاتار تین ورلڈ کپ کے اعلان سے بنگلہ دیش کے لئے بین الاقوامی کیلنڈر تیار کرنا آسان ہوگیا ہے اور ملتوی سیریز پر غور کیا جارہا ہے۔
انہوں نے بتایا کہ سری لنکا کا دورہ ان کی پہلی ترجیح ہے اور دونوں ممالک کے کرکٹ بورڈ رواں سال اس سیریز کے انعقاد پر راضی ہیں۔
