ترمیم شدہ شہری قانون کے خلاف آج بہار بند کے دوران پھلواری شریف میں مظاہرہ کر رہے لوگوں پر پولیس نے فائرنگ کی جس کے سبب نو افراد شدید طور پر زخمی ہوگئے جنہیں ایمس میں داخل کرایا گیا ہے۔
ذرائع سے ملی اطلاع کے مطابق تقریبا ایک بج کر تیس منٹ کے آس پاس پھلواری شریف کے مچھلی مارکیٹ کے قریب لوگوں نے مظاہرین پر پتھر پھینکے، جس سے کچھ لوگوں کو چوٹیں آئیں۔ اس میں کچھ پولیس والے بھی زخمی ہوئے۔
پولیس نے اس کے جواب میں پرامن طور پر مظاہرہ کررہے مظاہرین پر فائرنگ شروع کر دی پولیس کی گولی سے 9 افراد شدید طور پر زخمی ہوئے، جنہیں امارت شرعیہ کے ایمبولینس سے ایمس میں داخل کرایا گیا ہے۔
پھلواری شریف کو پولیس چھاؤنی میں تبدیل کردیا گیا ہے ریپڈ ایکشن فورس سڑکوں پر گشت کر رہی ہے۔ پٹنہ کی ایس ایس پی سمیت دوسرے تمام پولیس افسران موجود ہیں۔ اس واقعے کے فوراً بعد امیر شریعت حضرت مولانا ولی رحمانی نے فون پر وزیر اعلی نتیش کمار اور آئی جی پٹنہ سے گفتگو کی جس کے بعد بڑی تعداد میں ریپڈ ایکشن فورس کو بھیج دیا گیا۔
امارت شرعیہ کے ایک معتبر ذرائع نے بتایا کہ اس تعلق سے ہم لوگوں کو کل ہی خبر ملی تھی کہ کچھ سماج دشمن عناصر مظاہرین پر حملہ کر سکتے ہیں۔ ہم نے اس کی اطلاع پھلواری شریف تھانہ کو دی تھی۔
اس واقعہ کے دوران کچھ پولیس والے امارت شرعیہ کے احاطے میں بھی گھس گئے تھے ابھی اب حالات کشیدہ مگر قابو میں ہیں، ایکشن فورس کیمپ کر رہی ہے۔
