بھارت کی جنوبی ریاست تلنگانہ کے دارالحکومت حیدرآباد میں واقع مولانا آزاد نیشنل اردو یونیورسٹی میں آن لائن درخواست داخل کرنے کی سہولت یونیورسٹی ویب سائٹ manuu.edu.in پر دستاب ہے۔
خیال رہے کہ جز وقتی ڈپلوما اور سرٹیفکیٹ کورسز کی آخری تاریخ 20 نومبر ہے، تاہم یونیورسٹی میں پوسٹ گریجویٹ پروگرام (ایم اے، اردو، انگریزی، ہندی، عربی، مطالعات ترجمہ، فارسی، مطالعات نسواں، نظم و نسق عامہ، سیاسیات، سوشل ورک، اسلامک اسٹڈیز، تاریخ، معاشیات، سماجیات، صحافت و ترسیل عامہ، ایم کام اور ایم ایس سی، ریاضی) وغیرہ کورسز داخلے جاری ہیں۔
وہیں دوسری جانب انڈر گریجویٹ پروگرامز میں بی اے، بی اے (آنرس) جے ایم سی، بی کام، بی ایس سی (ریاضی، طبیعات،کیمیا۔ ایم پی سی)، بی ایس سی (ریاضی، طبیعات، کمپیوٹر سائنس، ایم پی سی ایس) اور بی ایس سی (حیاتی علوم زیڈ بی سی)، بیچلر آف ووکیشنل کورسز کے تحت میڈیکل امیجنگ ٹکنالوجی (ایم آئی ٹی) اور میڈیکل لیبارٹری ٹکنالوجی (ایم ایل ٹی) جیسے کورسز میں بھی داخلے جاری ہیں۔
اس کے علاوہ مدارس کے فارغ طلبہ کے لیے برائے داخلہ انڈر گریجویٹ (بی کام/ بی ایس سی) اور پالی ٹیکنک پروگرامز کے لیے برج (رابطہ) کورسز میں داخلے دیے جارہے ہیں۔
خیال رہے کہ لیٹرل انٹری کے تحت بی ٹیک اور پالی ٹیکنیک میں اہل طلبہ کو راست داخلے اور پی جی ڈپلوما ان ریٹیل مینجمنٹ اور جزوقتی ڈپلوما پروگرامز میں اردو، ہندی، عربی، فارسی اور اسلامک اسٹڈیز، تحسین غزل و اردو میں سرٹیفکیٹ کورس بھی دستیاب ہیں۔
تمام کورسس کی تفصیلات کے لیے یونیورسٹی ویب سائٹ ملاحظہ کریں، اس کے علاوہ یونیورسٹی کے انٹرنس پر مبنی ریگولر کورسز میں داخلہ کے لیے انٹرنس ٹسٹ 28، 29 اور 30 ستمبر کو منعقد کیے جائیں گے۔
اہل درخواست گذار طلبہ یونیورسٹی ویب سائٹ سے ہال ٹکٹ ڈاؤن لوڈ کرسکتے ہیں۔
واضح رہے کہ انٹرنس کا تفصیلی شیڈول اور دیگر تفصیلات یونیورسٹی ویب سائٹ پر دستیاب ہیں۔
یاد رہے کہ اس دوران نظامت داخلہ کی اطلاع کے بموجب ایسے امیدواروں جنہوں نے داخلے کے لیے مختلف زمروں کے تحت درخواست دی ہے، ان کو مطلع کیا جاتا ہے کہ انہیں اپنا سرٹیفکیٹ اپ لوڈ کرنا ہوگا۔
لہٰذا او بی سی، ایس سی/ ایس ٹی، ای ڈبلیو ایس اور پی ڈبلیو ڈی امیدوار اپنا متعلقہ سرٹیفکیٹ جو کہ حکومت ہند کے فارمیٹ میں ہو تیار رکھیں، وگرنہ صورت دیگر میں فارمیٹ مسترد کردیے جائیں گے، جبکہ سرٹیفکیٹ اپ لوڈ کرنے کی تاریخ کی اطلاع بعد میں دی جائے گی۔
