وزیر اعظم کے یوم پیدائش کے موقع پر بھارتیہ جنتا پارٹی کی جانب سے ملک بھر میں کئی اہم پروگرامز منعقد کیے جارہے ہیں۔ پارٹی اسے 'سیوا سپتاہ' کے طور پر منا رہی ہے۔
اترپردیش، بہار، راجستھان، گجرات اور مہاراشٹر سمیت دیگر ریاستوں میں وزیر اعظم نریندر مودی کا یوم پیدائش سیوا سپتاہ کے طور پر منایا جا رہا ہے، وہیں لوگ ان کی لمبی عمر کے لیے دعائیں بھی کر رہے ہیں۔
عالمی رہنما بھی وزیراعظم کو ان کے یوم پیدائش کے موقع پر انہیں مبارکباد بھیج رہے ہیں اور ان کی طویل عمری کی خواہش کا اظہار کر رہے ہیں۔
نیپال کے وزیر اعظم کے پی شرما اولی نے وزیراعظم مودی کو مبارکباد دی ہے۔ انہوں نے کہا کہ ' یوم پیدائش کے موقع پر وزیر اعظم نریندر مودی کو مبارکباد، میں آپ کے لیے صحت و تندرستی اور خوشی کی دعا کرتا ہوں۔ ہم دونوں ممالک تعلقات مزید مضبوط بنانے کے لیے ساتھ مل کر کام کرنا جاری رکھیں گے۔
ملک بھر میں وزیراعظم کے یوم پیدائش کو الگ الگ طریقوں سے منایا جا رہا ہے۔
صدر جمہوریہ رامناتھ کووند، وزیر داخلہ امت شاہ، کانگریس کے سابق صدر راہل گاندھی سمیت متعدد رہنماؤں نے مودی کو ان کے یوم پیدائش پر مبارکباد پیش کی ہے۔
وہیں روسی صدر ولادیمیر پوتن نے وزیر اعظم نریندر مودی کو 70 ویں سالگرہ کی مبارکباد پیش کی۔
صدر پوتن نے اپنے تہنیتی پیغام میں کہا کہ 'میں آپ کے ساتھ تعمیری بات چیت جاری رکھنے اور باہمی اور بین الاقوامی ایجنڈے و دیگر امور پر مل کر کام کرنے کا متمنی ہوں۔'
