یورپی ملک یوکرین سے تقریبا 144 سے زائد بھارتی شہریوں کو 'وندے بھارت مشن' کے تحت ایئر انڈیا کی فلائٹ کے ذریعہ مدھیہ پردیش میں واقع اندور کے دیوی اہلیہ بائی ہولکر ہوائی اڈے پر واپس لایا گیا ہے۔
دیوی اہلیہ بائی ہولکر ہوائی اڈے کے ڈائریکٹر اریاما سانیال نے بتایا ہے کہ 'یوکرین میں پھنسے ہوئے 144 بھارتی طلبا، ملازمین، خواتین اور بچوں کو وطن واپس لایا گیا ہے'۔
انہوں نے مزید بتایا کہ 'مسافروں کو ایئرپورٹ پر سینی ٹائز کیا گیا۔ ان کے سامان کی بھی صاف صفائی کی گئی'۔
محکمہ صحت کے ایک عہدیدار نے بتایا کہ 'ان طلبا میں زیادہ تر مدھیہ پردیش کے رہنے والے ہیں۔ ان میں اندور کے 29 افراد بھی شامل ہیں۔ جنہیں سات دن کے لئے شہر کے ایک قرنطینہ مرکز میں بھیج دیا گیا ہے'۔
عہدیدار نے بتایا کہ 'اس کے علاوہ واپس آنے والے کچھ افراد چھتیس گڑھ، راجستھان، اترپردیش، گجرات اور مہاراشٹرا کے بھی ہیں اور انہیں اپنے آبائی مقامات پر بھیج دیا گیا ہے'۔
